ৱাশ্বিংটন, ০৯ জুলাই (হি.স.)। আমেৰিকাৰ ৰাষ্ট্ৰপতি ড’নাল্ড ট্ৰাম্পে ইউক্ৰেইন যুদ্ধৰ বিষয়টোক লৈ ৰাছিয়াৰ ৰাষ্ট্ৰপতি ভ্লাদিমিৰ পুটিনক তীব্ৰ সমালোচনা কৰিছে । মঙলবাৰে হোৱাইট হাউছত অনুষ্ঠিত কেবিনেট বৈঠকৰ সময়ত ট্ৰাম্পে পুটিনৰ নীতিক লৈ অসন্তুষ্টি প্ৰকাশ কৰি ৰাছিয়াৰ ওপৰত অধিক কঠোৰ নিষেধাজ্ঞা আৰোপ কৰাৰ ইংগিত দিয়ে।
ট্ৰাম্পে কয়, আমি পুটিনৰ পৰা বহুত আজে বাজে কথা পাইছো। তেওঁ সকলো সময়তে অতি ধুনীয়া হোৱাৰ অভিনয় কৰে, কিন্তু সেই সকলোবোৰ অসাৰ বুলি প্ৰমাণিত হৈছে। তেওঁ লগতে কয় যে পুটিনে “বহুত লোকক হত্যা কৰি আছে, তেওঁৰ সৈন্যৰ লগতে ইউক্ৰেইনৰ জনসাধাৰণকো হত্যা কৰিছে।”
ইফালে, ছিনেটে প্ৰস্তাৱ কৰা ৰাছিয়াৰ ওপৰত অতিৰিক্ত নিষেধাজ্ঞাৰ বিধেয়কখনক সমৰ্থন কৰাৰ সন্দৰ্ভত সোধা প্ৰশ্নৰ উত্তৰত ট্ৰাম্পে কয় যে মই ইয়াক গুৰুত্বসহকাৰে বিবেচনা কৰি আছো, কিন্তু পৰৱৰ্তী পৰিকল্পনাৰ ক্ষেত্ৰত মৌন হৈ কয় যে আমি অলপ আচৰিত হোৱাটো নিবিচাৰোনে?
ইউক্ৰেইনলৈ আমেৰিকাই অধিক ‘ৰক্ষামূলক অস্ত্ৰ’ প্ৰেৰণ কৰিব বুলিও ট্ৰাম্পে ঘোষণা কৰে। এই সন্দৰ্ভত পেন্টাগনে সামৰ্থ্য পৰ্যালোচনা আৰম্ভ কৰিছে।
ইফালে ফ্ৰান্সৰ ৰাষ্ট্ৰপতি ইমানুৱেল মেক্ৰনে ব্ৰিটিছ সংসদত ভাষণ দি ইউক্ৰেইনক সমৰ্থন কৰি যোৱাৰ প্ৰতিশ্ৰুতি প্ৰকাশ কৰে। তেওঁ কয়, আমি শেষ মুহূৰ্তলৈকে যুঁজিম যাতে যুদ্ধবিৰতি হয় আৰু স্থায়ী শান্তি প্ৰতিষ্ঠা হয়। ইউক্ৰেইনত আমাৰ উমৈহতীয়া নীতি আৰু নিৰাপত্তাৰ প্ৰশ্ন জড়িত হৈ পৰিছে।
আনহাতে, ক্ৰেমলিনৰ মুখপাত্ৰ দিমিত্ৰী পেস্কোভে কয় যে ৰাছিয়াই অধিক আলোচনাৰ বাবে ইউক্ৰেইনৰ পৰা তাৰিখৰ প্ৰস্তাৱৰ বাবে অপেক্ষা কৰি আছে। লগতে ৰাছিয়াই কালি ইউক্ৰেইনৰ ড্নিপ্ৰ’পেট্ৰ’ভস্ক অঞ্চলৰ ডাচনে গাঁও দখল কৰাৰ দাবী কৰিছে।
হিন্দুস্থান সমাচাৰ / মনোজ কুমাৰ শইকীয়া
