ৱাশ্বিংটন, ২০ জুন (হি.স.)। ইজৰাইল আৰু ইৰাণৰ মাজত ক্ৰমবৰ্ধমান উত্তেজনা আৰু সামৰিক সংঘাতৰ পৰিপ্ৰেক্ষিতত আমেৰিকাৰ দুটা প্ৰধান বিমান সংস্থা ইউনাইটেড এয়াৰলাইন্স আৰু আমেৰিকান এয়াৰলাইন্সে মধ্যপ্ৰাচ্যলৈ যাত্ৰীবাহী বিমান চলাচল সাময়িকভাৱে বন্ধ কৰি দিছে।
ইউনাইটেড এয়াৰলাইন্সে নিজৰ বিবৃতিত কয় যে, “এই অঞ্চলত সংঘাতৰ প্ৰতি লক্ষ্য ৰাখি নিউৱৰ্ক আৰু ডুবাইৰ মাজত আমাৰ দৈনিক বিমান সেৱা আপাততঃ বন্ধ কৰি দিয়া হৈছে।” লগতে বিমান সংস্থাটোৱে পৰিস্থিতিৰ ওপৰত তীক্ষ্ণ দৃষ্টি ৰাখিব আৰু যাত্ৰীসকলক সম্ভৱপৰ সকলো সহায় আগবঢ়াব বুলিও জানিবলৈ দিয়ে।
একে সময়তে আমেৰিকান এয়াৰলাইন্সেও কাটাৰৰ ৰাজধানী ডোহা আৰু ফিলাডেলফিয়া আন্তঃৰাষ্ট্ৰীয় বিমানবন্দৰৰ মাজত বিমান সেৱাৰ সময়সূচী সলনি কৰিছে। বিমান সংস্থাটোৱে জনোৱা মতে, বৃহস্পতিবাৰে ডোহাৰ পৰা ফিলাডেলফিয়ালৈ যোৱা এখন বিমান নিৰ্ধাৰিত সময়তকৈ ৰাওনা হোৱাৰ বিপৰীতে বাকী সেৱাসমূহ ২২ জুনলৈকে সাময়িকভাৱে সালসলনি কৰা হৈছে।
আমেৰিকান এয়াৰলাইন্সে নিজৰ বিবৃতিত কয় যে আমি পৰিস্থিতিৰ ওপৰত চকু ৰাখিম, যাত্ৰীসকলৰ সুৰক্ষা আৰু সুৰক্ষাক অগ্ৰাধিকাৰ দিম আৰু প্ৰয়োজন হ’লে আমাৰ সেৱাত অধিক পৰিৱৰ্তন কৰিম।’ মধ্যপ্ৰাচ্যত চলি থকা ইজৰাইল-ইৰাণৰ সংঘাতই কেৱল স্থানীয় নহয়, বিশ্বব্যাপী বিমান সেৱাকো প্ৰভাৱিত কৰিবলৈ আৰম্ভ কৰিছে। আমেৰিকাৰ দুয়োটা বিমান সংস্থাৰ এই পদক্ষেপে ইংগিত দিয়ে যে বিমানৰ সুৰক্ষাৰ সন্দৰ্ভত গুৰুতৰ ভাবুকিৰ সৃষ্টি হৈছে।
হিন্দুস্থান সমাচাৰ / মনোজ কুমাৰ শইকীয়া
