– পুনৰ আৰম্ভ হ’ব চূড়ান্ত প্ৰত্যাহাৰৰ পৰ্যায়
ৰাষ্ট্ৰসংঘ, ২৯ আগষ্ট (হি.স.)। ৰাষ্ট্ৰসংঘৰ নিৰাপত্তা পৰিষদে (ইউএনএছচি) লেবাননত দীৰ্ঘদিনীয়া শান্তি অভিযানক “শেষবাৰৰ বাবে” বৃদ্ধি কৰাৰ সিদ্ধান্ত লৈছে। এতিয়া এই অভিযান ২০২৬ চনৰ ৩১ ডিচেম্বৰলৈকে চলি থাকিব, তাৰ পিছত এবছৰৰ ভিতৰত ইয়াৰ শৃংখলাবদ্ধ আৰু নিৰাপদ প্ৰত্যাহাৰ আৰম্ভ হ’ব।
ফ্ৰান্সে প্ৰস্তুত কৰা খচৰাত নিৰাপত্তা পৰিষদে বৃহস্পতিবাৰে সৰ্বসন্মতিক্ৰমে অনুমোদন জনায়। প্ৰস্তাৱটোত কোৱা হৈছে যে লেবানন চৰকাৰৰ সৈতে আলোচনা কৰি ২০২৬ চনৰ শেষৰ পৰা এবছৰৰ ভিতৰত লেবাননত থকা ৰাষ্ট্ৰসংঘৰ অন্তৱৰ্তীকালীন বাহিনী (ইউনিফিল-UNIFIL) প্ৰত্যাহাৰ কৰা হ’ব, যাতে দক্ষিণ লেবাননৰ নিৰাপত্তাৰ দায়িত্ব কেৱল লেবানন চৰকাৰৰ হাততহে থাকে।
১৯৭৮ চনত লেবাননত ৰাষ্ট্ৰসংঘৰ অন্তৱৰ্তীকালীন বাহিনী (ইউনিফিল) স্থাপন কৰা হৈছিল। এই অভিযানে দক্ষিণ লেবানন আৰু ইজৰাইলৰ মাজৰ সীমান্ত নিৰীক্ষণ কৰে। ২০০৬ চনত ইজৰাইল আৰু হিজবুল্লাহৰ মাজত হোৱা যুদ্ধৰ পিছত ইয়াৰ ক্ষমতা সম্প্ৰসাৰণ কৰা হয়, যাতে শান্তিৰক্ষীসকলে লেবাননৰ সেনাৰ সৈতে কাম কৰি সশস্ত্ৰ গোটসমূহক বাধা দিব পাৰে।
কিন্তু হিজবুল্লাহৰ প্ৰভাৱৰ বাবে এই অভিযান বিতৰ্কিত হৈ পৰিছে। ইজৰাইলৰ ৰাষ্ট্ৰসংঘৰ ৰাষ্ট্ৰদূত ডেনি ডেননে কয় যে, দশক দশক ধৰি ইউনিফিলৰ সম্প্ৰসাৰণ এক ভ্ৰম বুলি প্ৰমাণিত হৈছে। এই অভিযানে হিজবুল্লাহক এক বিপজ্জনক আঞ্চলিক শক্তি হিচাপে গঢ়ি তুলিবলৈ অনুমতি দিলে।
আমেৰিকাই স্পষ্ট কৰি দিছে যে ইউনিফিলৰ বাবে এইটোৱেই শেষ সম্প্ৰসাৰণ। আমেৰিকাৰ ভাৰপ্ৰাপ্ত ৰাষ্ট্ৰদূত ড’ৰথী শ্বিয়াই কয় যে, যোৱা এবছৰত লেবাননৰ নিৰাপত্তা পৰিস্থিতিৰ বহু পৰিৱৰ্তন হৈছে। এতিয়া লেবাননে অধিক দায়িত্ব লোৱাৰ সময় আহি পৰিছে।
লেবাননৰ প্ৰধানমন্ত্ৰী নৱাফ চালামে এই প্ৰস্তাৱক আদৰণি জনায়। তেওঁ কয় যে ইজৰাইলে এতিয়াও দখল কৰি থকা পাঁচটা অঞ্চলৰ পৰা নিজৰ সেনাবাহিনী প্ৰত্যাহাৰ কৰাৰ আহ্বান পুনৰবাৰ প্ৰকাশ কৰিছে।
হিন্দুস্থান সমাচাৰ / মনোজ কুমাৰ শইকীয়া
