ৱাশ্বিংটন, ২৪ জুলাই (হি.স.)। হত্যাৰ দোষী সাব্যস্ত হোৱা এজন আমেৰিকান লোকক ভেনিজুৱেলাৰ কাৰাগাৰৰ পৰা মুকলি কৰি দিলে ট্ৰাম্প প্ৰশাসনে। যোৱা সপ্তাহত ভেনিজুৱেলাৰ কাৰাগাৰৰ পৰা কাৰাবন্দী বিনিময়ৰ অংশ হিচাপে মুকলি হোৱা এজন লোকে তিনিজন লোকক হত্যা কৰিছিল বুলি আদালতৰ নথি-পত্ৰত প্ৰকাশ পাইছে। এই ব্যক্তিজনৰ নাম দাহুদ হানিদ অৰ্টিজ বুলি কোৱা হয়। তেওঁৰ দ্বৈত আমেৰিকান আৰু ভেনিজুৱেলাৰ নাগৰিকত্ব আছে।
নিউয়ৰ্ক টাইমছৰ বাতৰি অনুসৰি যোৱা সপ্তাহত আমেৰিকাৰ বিদেশ মন্ত্ৰালয়ে ভেনিজুৱেলাৰ এখন কাৰাগাৰৰ পৰা ১০ জন আমেৰিকান আৰু আমেৰিকাৰ আইনী স্থায়ী বাসিন্দাক মুকলি কৰি দিয়াৰ সুবিধা প্ৰদান কৰিছিল। বিদেশ মন্ত্ৰী মাৰ্কো ৰুবিঅ’ই কয় যে এই গুৰুত্বপূৰ্ণ পদক্ষেপে বিদেশত অন্যায়ভাৱে আটক কৰা আমেৰিকানসকলৰ মংগল সুৰক্ষিত কৰাৰ প্ৰচেষ্টাক প্ৰতিনিধিত্ব কৰে।
কাৰাগাৰৰ পৰা মুক্তি পোৱাসকলৰ ভিতৰত ভেনিজুৱেলা-আমেৰিকান নাগৰিক ডাহুদ হানিদ অৰ্টিজো আছিল বুলি ভেনিজুৱেলাৰ আদালতৰ ৰেকৰ্ডৰ উদ্ধৃতি দি মাদ্ৰিদৰ অভিযুক্ত কাৰ্যালয়ৰ এজন বিষয়াই নিজৰ পৰিচয় প্ৰকাশ নকৰাকৈয়ে জানিবলৈ দিয়ে। ২০১৬ চনত স্পেইনৰ ৰাজধানী মাদ্ৰিদত তিনিজন লোকক হত্যা কৰাৰ অপৰাধত ভেনিজুৱেলাত দোষী সাব্যস্ত হৈছিল। ২০২৩ চনত ভেনিজুৱেলাৰ আদালতে তেওঁক ৩০ বছৰৰ কাৰাদণ্ডৰ শাস্তি প্ৰদান কৰিছিল।
সামৰিক নথি অনুসৰি ৫৪ বছৰীয়া অৰ্টিজে ১৯ বছৰ আমেৰিকান সেনাবাহিনীত কাৰ্যনিৰ্বাহ কৰিছিল। ইৰাকত আহত হোৱাৰ পিছত তেওঁক পাৰ্পল হাৰ্ট বঁটা প্ৰদান কৰা হয়। সেনাই জনোৱা মতে, অৰ্টিজক একাধিকবাৰ ইৰাকত নিয়োজিত কৰা হৈছিল। এই সময়ছোৱাত তেওঁ কেইবাবাৰো শাৰীৰিক আঘাতৰ সন্মুখীন হয়। পিছত প্ৰৱঞ্চনা আৰু চুৰিৰ দোষী সাব্যস্ত হোৱাৰ পিছত তেওঁক সেনাবাহিনীৰ পৰা বৰ্খাস্ত কৰা হয়।
हिन्दुस्थान समाचार / মনোজ কুমাৰ শইকীয়া
