ৱাশ্বিংটন, ২৫ অক্টোবৰ (হি.স.)। ফেণ্টানিল সম্পৰ্কীয় ৰাসায়নিক পদাৰ্থৰ আন্তঃৰাষ্ট্ৰীয় যোগানকাৰীৰ বিৰুদ্ধে কঠোৰ ব্যৱস্থা গ্ৰহণ কৰা আমেৰিকাৰ চোৰাংচোৱা সংস্থা ফেডাৰেল ব্যুৰো অৱ ইনভেষ্টিগেশ্যন (এফ বি আই)ৰ সঞ্চালক কাছ পেটেলে অহা মাহত চীন ভ্ৰমণ কৰিব। বিদেশত উৎপাদিত এনে ৰাসায়নিক পদাৰ্থ আৰু ইয়াৰ সৈতে জড়িত পুঁজিৰ উৎসৰ বিৰুদ্ধে যুঁজিবলৈ আমেৰিকাই ড্ৰাগছ বিৰোধী নীতি আৰম্ভ কৰিছে। ৰাষ্ট্ৰপতি ট্ৰাম্প আৰু পেটেলে আমেৰিকাত ড্ৰাগছ সংকটৰ ইন্ধন যোগোৱাৰ বাবে চীনক দোষাৰোপ কৰিছে।
চিবিএছ নিউজৰ বাতৰি অনুসৰি কাছ পেটেলে তেওঁৰ ভ্ৰমণৰ সময়ত চীনৰ নেতৃত্ব আৰু বিষয়াসকলৰ আগত ফেণ্টানিলৰ বিষয়টো উত্থাপন কৰিব। দক্ষিণ কোৰিয়াত চীনৰ ৰাষ্ট্ৰপতি ছি জিনপিঙৰ সৈতে হোৱা বৈঠকত ৰাষ্ট্ৰপতি ড’নাল্ড ট্ৰাম্পেও অবৈধ ড্ৰাগছৰ বিষয়টো উত্থাপন কৰিব। বৃহস্পতিবাৰে ট্ৰাম্পে কয় যে মই তেওঁক প্ৰথম প্ৰশ্নটো সুধিম ফেণ্টানিলৰ বিষয়ে। ড্ৰাগছ সৰবৰাহৰ সৈতে জড়িত ড্ৰাগছ কাৰ্টেলৰ ওপৰত কৰা দমনৰ ওপৰত আলোকপাতৰ বাবে হোৱাইট হাউছ ষ্টেট ডাইনিং ৰুমত অনুষ্ঠিত এক অনুষ্ঠানত ট্ৰাম্পে এই মন্তব্য কৰে।
ট্ৰাম্পে কয় যে প্ৰশাসনে এই পৰ্যন্ত যথেষ্ট পৰিমাণৰ ড্ৰাগছ জব্দ কৰিছে। পেটেলে কয় যে প্ৰশাসনে লাখ লাখ লোকৰ জীৱন ৰক্ষা কৰিছে। দ্বিতীয়টো কাৰ্যকালৰ বাবে কাৰ্যভাৰ গ্ৰহণ কৰাৰ কিছুদিন পিছতে ট্ৰাম্পে কয় যে চীনে আমেৰিকালৈ ড্ৰাগছৰ প্ৰবাহ ৰোধ কৰাত ব্যৰ্থ হৈছে। যোৱা মাহত ৩ ছেপ্টেম্বৰত পেটেলে প্ৰকাশ কৰিছিল যে চীনৰ কিছুমান কোম্পানীয়ে ফেণ্টানিল উৎপাদনৰ বাবে প্ৰয়োজনীয় পূৰ্বসূৰী ৰাসায়নিক পদাৰ্থ প্ৰস্তুত কৰা বুলি অভিযোগ উঠিছে। ১৬ ছেপ্টেম্বৰত চেনেটত সাক্ষ্য দিয়াৰ সময়ত পেটেলে কয় যে সংস্থাটোৱে মূল চীনৰ ব্যৱসায় আৰু ফেণ্টানাইল উৎপাদনৰ সৈতে জড়িত বুলি সন্দেহযুক্ত উদ্যোগৰ সৈতে জড়িত ক্ৰিপ্টোকাৰেন্সী ৱালেটো জব্দ কৰিছে।
हिन्दुस्थान समाचार / মনোজ কুমাৰ শইকীয়া
