বেইজিং, ২৬ নৱেম্বৰ (হিস.)। আন্তঃৰাষ্ট্ৰীয় মানৱ সংহতি দিৱসত চীনৰ ৰাষ্ট্ৰপতি ছি জিনপিঙে পেলেষ্টাইন জনসাধাৰণক আগতীয়াকৈ শুভেচ্ছা জ্ঞাপন কৰে। ৰাষ্ট্ৰসংঘৰ পৰম্পৰা আছে যে প্ৰতি বছৰে ২৯ নৱেম্বৰত পেলেষ্টাইনী নাগৰিকৰ বাবে আন্তঃৰাষ্ট্ৰীয় মানৱ সংহতি দিৱস পালন কৰা হয়। মঙলবাৰে ৰাষ্ট্ৰসংঘৰ বৈঠকলৈ ছিয়ে প্ৰেৰণ কৰে অভিনন্দন বাৰ্তা।
চীনৰ চৰকাৰী সংবাদ সংস্থা জিনহুয়াই প্ৰকাশ কৰা অনুসৰি ছিয়ে তেওঁৰ অভিনন্দন বাৰ্তাত উল্লেখ কৰিছে যে মধ্যপ্ৰাচ্যৰ সংকটৰ মূলতে পেলেষ্টাইন বিষয়টো। আঞ্চলিক স্থিতিশীলতা বজাই ৰাখিবলৈ পেলেষ্টাইন সমস্যাটো ন্যায্যভাৱে সমাধান কৰিব লাগিব। তেওঁ আৰু কয় যে বৰ্তমানৰ পৰিস্থিতিৰ বাবে বিশ্ব সম্প্ৰদায়ে এক সহমতত উপনীত হ’ব লাগিব আৰু গাজাত স্থায়ী যুদ্ধবিৰতিৰ ব্যৱস্থা কৰিব লাগিব।
ছিয়ে কয় যে তেওঁ “পেলেষ্টাইনৰ ওপৰত পেলেষ্টাইনৰ শাসন”ৰ নীতিক সমৰ্থন কৰে। তেওঁ গাজাৰ মানৱীয় পৰিস্থিতি দ্ৰুতগতিত উন্নত কৰাৰ লগতে পেলেষ্টাইন জনসাধাৰণৰ দুখ-কষ্ট দূৰ কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে। তেওঁ কয় যে আটাইতকৈ গুৰুত্বপূৰ্ণ কথাটো হ’ল পেলেষ্টাইন সমস্যাৰ আগতীয়া ৰাজনৈতিক নিষ্পত্তিৰ প্ৰসাৰৰ বাবে দুখন ৰাষ্ট্ৰৰ সমাধানৰ প্ৰচেষ্টাত মনোনিৱেশ কৰা।
তেওঁ কয় যে পেলেষ্টাইনৰ লগত অন্যায় হ’বলৈ দিয়া নহ’ব। ৰাষ্ট্ৰসংঘৰ নিৰাপত্তা পৰিষদৰ স্থায়ী সদস্য হিচাপে চীনে সদায় পেলেষ্টাইন জনসাধাৰণৰ দাবীক সমৰ্থন কৰিব। মন কৰিবলগীয়া যে ১৯৭৮ চনৰ পৰা ২৯ নৱেম্বৰত পেলেষ্টাইন জনসাধাৰণৰ সৈতে আন্তঃৰাষ্ট্ৰীয় মানৱ সংহতি দিৱস পালন কৰা হৈছে। বিভাজন পৰিকল্পনা বা প্ৰস্তাৱ ১৮১ (II) নামেৰে জনাজাত এই প্ৰস্তাৱৰ লক্ষ্য আছিল এখন আৰব দেশ আৰু ইহুদী দেশ সৃষ্টি কৰা। ১৯৪৭ চনৰ ২৯ নৱেম্বৰত ইয়াক গ্ৰহণ কৰা হয়।এই দিনটোৱে বিশ্বৰ দৃষ্টি আকৰ্ষণ কৰে যে পেলেষ্টাইনৰ প্ৰশ্নটো এতিয়াও অমীমাংসিত হৈ আছে।
हिन्दुस्थान समाचार / অৰৱিন্দ
