ৱাশ্বিংটন, ৩০ ডিচেম্বৰ (হি.স.)। ইৰাণৰ বিৰুদ্ধে পুনৰ কঠোৰ স্থিতি গ্ৰহণ কৰিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। তেওঁ সকীয়াই দিয়ে যে যদি ইৰাণে নিজৰ বেলিষ্টিক মিছাইল প্ৰগ্ৰেম পুনৰ প্ৰতিষ্ঠা কৰাৰ চেষ্টা কৰে তেন্তে আমেৰিকাই পুনৰ সামৰিক আক্ৰমণ চলাব পাৰে।
ইজৰাইলৰ প্ৰধানমন্ত্ৰী বেঞ্জামিন নেতান্যাহুৰ সৈতে হোৱা বৈঠকৰ পূৰ্বে সংবাদ মাধ্যমৰ সৈতে হোৱা এক সাক্ষাৎকাৰত ট্ৰাম্পে কয় যে, আমি খবৰ পাইছো যে ইৰাণে পুনৰ নিজৰ কাৰ্যসূচী শক্তিশালী কৰাৰ চেষ্টা কৰিছে। যদি তেনেকুৱা হয় তেন্তে আমি পুনৰ ইয়াক বন্ধ কৰিব লাগিব। আমি শক্তিশালী ব্যৱস্থা গ্ৰহণ কৰিম।
ইৰাণে যদি নিজৰ পাৰমাণৱিক কাৰ্যসূচী পুনৰ নিৰ্মাণৰ বাবে পদক্ষেপ গ্ৰহণ কৰে তেন্তে আমেৰিকাই তৎক্ষণাত আক্ৰমণৰ সমৰ্থন কৰিব বুলিও ট্ৰাম্পে স্পষ্ট কৰি দিয়ে। তেওঁ ইৰাণক পৰামৰ্শ দিয়ে যে সংঘাটৰ সন্মুখীন হোৱাতকৈ আমেৰিকাৰ সৈতে আপোচ কৰাটোৱেই বুদ্ধিমানৰ কাম হ’ব।
ৰাষ্ট্ৰপতিগৰাকীয়ে কয়, তেওঁলোকৰ বাবে আপোচ কৰাটো ভাল হ’ব। তেওঁলোকৰ আগতেও সুযোগ আছিল, কিন্তু তেওঁলোকে তেনে কৰা নাছিল, আৰু তাৰ পিছত তেওঁলোকে এক বৃহৎ আক্ৰমণৰ সন্মুখীন হ’বলগীয়া হৈছিল।
মন কৰিবলগীয়া যে চলিত বৰ্ষৰ আৰম্ভণিতে আমেৰিকাই ইৰাণৰ তিনিটা পাৰমাণৱিক কেন্দ্ৰত বোমা বিস্ফোৰণ কৰিছিল, যিটোক ট্ৰাম্পে এক বৃহৎ সামৰিক সফলতা বুলি অভিহিত কৰিছিল। যোৱা কেইটামান সপ্তাহত ইজৰাইলৰ প্ৰধানমন্ত্ৰী নেতানিয়াহুৱে দাবী কৰিছে যে ইৰাণে পুনৰবাৰ বেলিষ্টিক মিছাইল কাৰ্যসূচী সম্প্ৰসাৰণ কৰিছে। বিশ্বাস কৰা হৈছে যে নেতানিয়াহুৱে এই বিষয়ত অধিক কঠোৰ ব্যৱস্থা ল’বলৈ ট্ৰাম্পক আহ্বান জনাব পাৰে।
हिन्दुस्थान समाचार / অৰৱিন্দ
