ঢাকা, ২৮ ডিচেম্বৰ (হি.স.)। বাংলাদেশত ফেব্ৰুৱাৰী মাহৰ নিৰ্বাচনৰ বাবে মনোনয়ন দাখিলৰ সময়সীমাৰ মাত্ৰ এদিন পূৰ্বে ছাত্ৰ নেতৃত্বাধীন নেশ্যনেল চিটিজেনছ পাৰ্টিৰ ভিতৰত উল্লেখযোগ্য বিভাজনৰ সৃষ্টি হৈছে। জামাত-ই-ইছলামীৰ সৈতে মিত্ৰতা আৰু আসন ভাগ-বতৰাৰ ব্যৱস্থাক লৈ প্ৰতিবাদত দুই বিশিষ্ট নেতাই পদত্যাগ কৰিছে। আন কেইবাজনো অসন্তুষ্ট নেতাই শীঘ্ৰে সংগঠনটো এৰিব পাৰে বুলি চৰ্চা চলিছে। এই নেতাসকলে সংগঠনটোৰ আহ্বায়ক নাহিদ ইছলামলৈ পত্ৰ লিখি জামাতৰ সৈতে হোৱা মিত্ৰতাক বিশ্বাসঘাতকতা আৰু মতাদৰ্শৰ দুৰ্বলতা বুলি অভিহিত কৰিছে।
বাংলাদেশৰ আগশাৰীৰ কাকত ডেইলী ষ্টাৰৰ তথ্য অনুসৰি ছাত্ৰ আন্দোলনৰ পৰা ওলাই অহা ছাত্ৰ নেতৃত্বাধীন এন চি পিৰ জ্যেষ্ঠ যুটীয়া সম্পাদক তছনীম জাৰাই শনিবাৰে পদত্যাগ ঘোষণা কৰাৰ বিপৰীতে বৃহস্পতিবাৰে যুটীয়া সম্পাদক আৰ্ছাদুল হকে পদত্যাগ কৰে। বাতৰি অনুসৰি জামাত-ই-ইছলামীৰ সৈতে মিত্ৰতাক লৈ বিচলিত হোৱা আন কেইবাজনো অসন্তুষ্ট নেতাই অতি সোনকালে পদত্যাগ কৰিব পাৰে।
এই অসন্তুষ্ট নেতাসকলে সংগঠনটোৰ আহ্বায়ক নাহিদ ইছলামলৈ এখন পত্ৰ লিখি জামাত-ই-ইছলামীৰ সৈতে হোৱা মিত্ৰতাক তৃণমূল পৰ্যায়ৰ নেতাক বিশ্বাসঘাতকতা বুলি অভিহিত কৰি দলৰ মতাদৰ্শ দুৰ্বল হ’ব বুলি কয়। পত্ৰখনত কোৱা হৈছে যে, আমাৰ ভিত্তি হৈছে আমাৰ দলৰ উল্লেখিত মতাদৰ্শ, জুলাই বিদ্ৰোহৰ সৈতে জড়িত ঐতিহাসিক জবাবদিহিতা, আৰু গণতান্ত্ৰিক নৈতিকতাৰ মৌলিক প্ৰশ্ন।
জুলাই বিদ্ৰোহৰ কথা উল্লেখ কৰি পত্ৰখনত অভিযোগ কৰা হৈছে যে জামাত-ই-ইছলামী আৰু ইয়াৰ ছাত্ৰ শাখা ইছলামী ছাত্ৰ শিবিৰে বিভাজনমূলক ৰাজনীতি, অনুপ্ৰৱেশ, ভেঙুচালি, এনচিপিৰ বিৰুদ্ধে মিছা অভিযোগ, ছাত্ৰ সংঘৰ নিৰ্বাচনৰ সময়ত প্ৰচাৰ, মহিলা সদস্যৰ অনলাইন চৰিত্ৰ হত্যা আদিত লিপ্ত হৈছে। ১৯৭১ চনৰ স্বাধীনতা বিৰোধী ভূমিকা, গণহত্যাত জামাতৰ সহযোগিতা, যুদ্ধকালীন অপৰাধৰ ওপৰত জামাতৰ স্থিতি উল্লেখ কৰি পত্ৰখনত উল্লেখ কৰা হৈছে যে এইবোৰ বাংলাদেশৰ গণতান্ত্ৰিক বিবেক আৰু দলৰ মূল্যবোধৰ সৈতে মৌলিকভাৱে অসঙ্গতিপূৰ্ণ।
তেওঁলোকে উল্লেখ কৰে যে জামাত-ই-ইছলামীৰ সৈতে যিকোনো মিত্ৰতাই দলটোৰ নৈতিক স্থিতি দুৰ্বল কৰি তুলিব আৰু ইয়াৰ বিশ্বাসযোগ্যতাৰ ক্ষতি কৰিব। পত্ৰখনত নেতাসকলক সোঁৱৰাই দিয়া হৈছে যে তেওঁলোকে পূৰ্বে সংস্কাৰৰ বিষয়ত জামাতৰ দ্বৈত মানদণ্ডক সমালোচনা কৰিছিল।দলৰ আহ্বায়কলৈ লিখা এখন পত্ৰত এনচিপিৰ ৩০জন নেতাই লিখিছে, মধ্যপন্থী সমৰ্থক যদি গুচি যায় তেন্তে দলটোৱে কেন্দ্ৰীয়তাবাদী ভিত্তি হেৰুৱাব। ইয়াৰ ফলত এনচিপিৰ স্বতন্ত্ৰ ৰাজনৈতিক সামৰ্থ্যৰ ক্ষতি হ’ব। পত্ৰখনত জামাতৰ সৈতে যিকোনো মিত্ৰতাৰ বিৰুদ্ধে স্পষ্ট স্থিতিৰ আহ্বান জনোৱা হৈছে।
ছাত্ৰ নেতৃত্বাধীন এনচিপিয়ে প্ৰথমে বিগত দুমাহ ধৰি অকলে নিৰ্বাচনত অৱতীৰ্ণ হ’বলৈ প্ৰস্তুতি চলাইছিল যদিও ঢাকা-৮ৰ নিৰ্দলীয় প্ৰাৰ্থী তথা ইনকিলাব মঞ্চৰ মুখপাত্ৰ শ্বৰীফ ওছমান বিন হাদীক হত্যা কৰাৰ পিছতে স্থিতি সলনি কৰে। তেতিয়াৰ পৰাই এন চি পিৰ নেতা-কৰ্মীৰ মাজত নিৰাপত্তাজনিত চিন্তা বৃদ্ধি পোৱাৰ বিপৰীতে দলৰ ভিতৰৰ আন এটা শক্তিশালী ফৈদে অনুভৱ কৰিবলৈ লৈছে যে ৰাষ্ট্ৰীয় ৰাজনীতিত এন চি পিৰ স্থিতি শক্তিশালী কৰিবলৈ এটা বৃহৎ ৰাজনৈতিক শক্তিৰ সৈতে মিত্ৰতা প্ৰয়োজনীয়। ফলস্বৰূপে ই জামাত-ই-ইছলামীৰ সৈতে মিত্ৰতাৰ দিশত আগবাঢ়িছে।
কিন্তু জামাতৰ সৈতে মিত্ৰতা কৰাৰ চেষ্টাক লৈ দলৰ ভিতৰত তীব্ৰ আপত্তি আছে। সংগঠনটোৰ সৈতে জড়িত কেইবাগৰাকীও মহিলা নেতাইও ধৰ্মীয় দলৰ সৈতে মিত্ৰতাৰ প্ৰতি মুকলিকৈ মতানৈক্য প্ৰকাশ কৰিছে। এনচিপিয়ে এই মিত্ৰতা সন্দৰ্ভত এতিয়াও কোনো আনুষ্ঠানিক ঘোষণা কৰা নাই যদিও জামাতৰ সৈতে আসন ভাগ-বতৰা আলোচনা চূড়ান্ত পৰ্যায়ত আছে বুলি চৰ্চা চলিছে, দলৰ নেতাসকলে পদত্যাগ ঘোষণা কৰিবলৈ আৰম্ভ কৰিছে।
हिन्दुस्थान समाचार / মনোজ কুমাৰ শইকীয়া
