কাঠমাণ্ডু, ২৭ নৱেম্বৰ (হি.স.)। অহা ৫ মাৰ্চত হ’বলগীয়া প্ৰতিনিধি সদনৰ নিৰ্বাচনৰ বাবে ৰাষ্ট্ৰপতি ৰামচন্দ্ৰ পৌডেলে সেনা মোতায়েনৰ অনুমোদন জনাইছে। মন্ত্ৰী পৰিষদৰ পৰামৰ্শৰ ভিত্তিত সামৰিক অভিযানৰ অনুমতি প্ৰদান কৰা হৈছিল।
ৰাষ্ট্ৰপতি কাৰ্যালয়ৰ মুখপাত্ৰ প্ৰদীপ কুমাৰ কয়ইৰালাই বৃহস্পতিবাৰে উল্লেখ কৰে যে সিংহা দৰবাৰত অনুষ্ঠিত নিৰাপত্তা পৰিষদৰ ৪১ সংখ্যক বৈঠকত নিৰ্বাচনৰ সময়ত সেনা নিয়োগ কৰিবলৈ মন্ত্ৰী পৰিষদক পৰামৰ্শ দিয়াৰ সিদ্ধান্ত লোৱা হৈছে। প্ৰধানমন্ত্ৰী সুশিলা কাৰ্কীৰ অধ্যক্ষতাত মন্ত্ৰী পৰিষদৰ এই সিদ্ধান্তত ৰাষ্ট্ৰপতিয়ে অনুমোদন জনাই সামৰিক নিয়োগৰ পথ মুকলি কৰিছে।
নিৰ্বাচনৰ সময়ত নিৰাপত্তাৰ ব্যৱস্থাত নিৰাপত্তা সংস্থা নিয়োগ সম্পৰ্কীয় বিশদ ব্যৱস্থা অন্তৰ্ভুক্ত কৰা হৈছে। এই নিৰাপত্তা পৰিকল্পনা তিনিটা পৰ্যায়ত বিভক্ত। নিৰ্বাচনৰ পূৰ্বে, নিৰ্বাচনৰ সময়ছোৱাত, নিৰ্বাচনৰ পিছৰ সময়ছোৱাত সেনাবাহিনীক বিভিন্ন ধৰণে নিয়োগ কৰা হ’ব। এই প্ৰতিটো পৰ্যায়তে নিৰাপত্তাৰ ব্যৱস্থা কেনেদৰে ৰূপায়ণ কৰা হ’ব তাৰ সবিশেষ এই পৰিকল্পনাত সন্নিবিষ্ট কৰা হৈছে। এইবাৰ নিৰাপত্তাজনিত প্ৰত্যাহ্বান গুৰুতৰ বুলি বিবেচনা কৰি নিৰ্বাচনৰ এমাহ পূৰ্বে সেনা মোতায়েনৰ প্ৰস্তুতি কৰা হৈছে।
हिन्दुस्थान समाचार / অৰৱিন্দ
