নতুন দিল্লী, ২৭ নৱেম্বৰ (হি.স.)। প্ৰধানমন্ত্ৰী নৰেন্দ্ৰ মোদীয়ে বৃহস্পতিবাৰে ভিডিঅ’ কনফাৰেন্সিঙৰ জৰিয়তে ভাৰতীয় মহাকাশ ষ্টাৰ্টআপ স্কাইৰুটৰ ইনফিনিটি কেম্পাছ উদ্বোধন কৰে। তেওঁ কয় যে ভাৰতৰ মহাকাশ খণ্ডত যোৱা ছয়-সাত বছৰত বৃহৎ পৰিৱৰ্তন হৈছে আৰু এতিয়া ই এক মুকলি, সহযোগিতামূলক, আৰু উদ্ভাৱন-চালিত অৰ্থনীতিলৈ পৰিণত হৈছে।
প্ৰধানমন্ত্ৰীয়ে কয় যে তেওঁৰ চৰকাৰে মহাকাশ খণ্ড ব্যক্তিগত খণ্ডৰ বাবে মুকলি কৰি দিয়াৰ ফলত দেশৰ যুৱক-যুৱতী, বিশেষকৈ জেন জি যুৱক-যুৱতীসকলে সম্পূৰ্ণ সুফল লাভ কৰাৰ সুযোগ লাভ কৰিছে। মহাকাশ খণ্ডত ভাৰতৰ এনে সামৰ্থ্য আছে যিবোৰ মাত্ৰ কেইখনমান দেশৰহে আছে। আমাৰ ওচৰত দক্ষ অভিযন্তা, উচ্চমানৰ উৎপাদন অৰ্থনীতি, আৰু বিশ্বৰ অন্যতম শ্ৰেষ্ঠ লঞ্চ ছাইট আছে, লগতে উদ্ভাৱনক উৎসাহিত কৰা মানসিকতাও আছে। ভাৰতৰ যুৱক-যুৱতীসকলক উদ্ভাৱন, ৰিস্ক লোৱা, আৰু উদ্যোগীকৰণৰ সৈতে সংযোগ কৰি তেওঁ কয় যে ইয়াৰ দ্বাৰা ভাৰতক বিভিন্ন ক্ষেত্ৰত নতুন উচ্চতাত উপনীত হোৱাত সহায় কৰা হৈছে। স্কাইৰুটৰ ইনফিনিটি কেম্পাছ ভাৰতৰ নতুন চিন্তাধাৰা, উদ্ভাৱন, আৰু যুৱ শক্তিৰ প্ৰতিফলন।
লগতে তেওঁ স্কাইৰুটৰ প্ৰথমটো কক্ষপথৰ ৰকেট বিক্ৰম-১ উন্মোচন কৰে, য’ত উপগ্ৰহ কক্ষপথলৈ প্ৰেৰণ কৰাৰ ক্ষমতা আছে। এই অত্যাধুনিক কেন্দ্ৰটোত একাধিক উৎক্ষেপণ বাহনৰ ডিজাইন, বিকাশ, সংহতি, আৰু প্ৰশিক্ষণৰ বাবে প্ৰায় ২০,০০০ বৰ্গফুটৰ কৰ্মক্ষেত্ৰ থাকিব, আৰু প্ৰতিমাহে এটা কক্ষপথৰ ৰকেট নিৰ্মাণ কৰাৰ ক্ষমতা থাকিব।
মহাকাশৰ ক্ষেত্ৰত কাম কৰা চৰকাৰী সংস্থা ইছৰোক প্ৰশংসা কৰি প্ৰধানমন্ত্ৰীয়ে কয় যে দশক দশক ধৰি এই সংস্থাটোৱে ভাৰতৰ মহাকাশ যাত্ৰাক নতুন গতি প্ৰদান কৰিছে। ইয়াৰ নিৰ্ভৰযোগ্যতা, সামৰ্থ্য, আৰু কামে ভাৰতক সকলো দিশতে পৃথক কৰি তুলিছে। তেওঁ কয় যে ভাৰতৰ মহাকাশ প্ৰতিভাই বিশ্বজুৰি এক শক্তিশালী উপস্থিতি লাভ কৰিছে। ভাৰতৰ মহাকাশ খণ্ডৰ প্ৰতি বিশ্বব্যাপী উদ্ভাৱন প্ৰতিষ্ঠানসমূহ ক্ৰমান্বয়ে আকৰ্ষিত হৈছে। বিশ্বজুৰি সৰু উপগ্ৰহৰ চাহিদা ক্ৰমাগতভাৱে বৃদ্ধি পাইছে, আৰু মহাকাশক এতিয়া কৌশলগত সম্পদ হিচাপে স্বীকৃতি দিয়া হৈছে। অনাগত বছৰবোৰত বিশ্ব মহাকাশ অৰ্থনীতি দ্ৰুতগতিত সম্প্ৰসাৰণ হ’বলৈ সাজু হৈছে। ইয়াৰ দ্বাৰা ভাৰতৰ যুৱক-যুৱতীসকলৰ বাবে এক বৃহৎ সুযোগ।
উল্লেখযোগ্য যে স্কাইৰ’টে ভাৰতৰ আগশাৰীৰ ব্যক্তিগত কোম্পানী হিচাপে আত্মপ্ৰকাশ কৰিছে। ইয়াৰ প্ৰতিষ্ঠা কৰিছিল পৱন চন্দনা আৰু ভাৰত ঢাকাই। দুয়োজনেই ইণ্ডিয়ান ইনষ্টিটিউট অৱ টেকন’লজিৰ প্ৰাক্তন ছাত্ৰ আৰু ইছৰোৰ প্ৰাক্তন বিজ্ঞানী যি এতিয়া উদ্যোগী হৈ পৰিছে। স্কাইৰুটে ২০২২ চনৰ নৱেম্বৰ মাহত নিজৰ বিক্ৰম-এছ ছাবঅৰ্বিটাল ৰকেট উৎক্ষেপণ কৰিছিল, যাৰ ফলত ই মহাকাশলৈ ৰকেট নিক্ষেপ কৰা প্ৰথমটো ভাৰতীয় ব্যক্তিগত কোম্পানী হিচাপে পৰিগণিত হৈছিল।
हिन्दुस्थान समाचार / অৰৱিন্দ
