কইম্বাটুৰ (তামিলনাডু), ১৯ নৱেম্বৰ (হি.স.)। প্ৰধানমন্ত্ৰী নৰেন্দ্ৰ মোদীয়ে আজি বুধবাৰে কইম্বাটুৰৰ কোডিছিয়া চৌহদত তিনিদিনীয়াকৈ আয়োজন কৰা দক্ষিণ ভাৰত জৈৱিক কৃষি সন্মিলন উদ্বোধন কৰিব। সন্মিলনৰ সভাপতিত্ব কৰিব তামিলনাডুৰ ৰাজ্যপাল আৰ.এন. ৰবিয়ে। ইয়াত তামিলনাডু, পুডুচেৰী, কেৰালা, কৰ্ণাটক আৰু অন্ধ্ৰপ্ৰদেশৰ কৃষক, জৈৱিক কৃষি বিজ্ঞানী, বিতৰক আৰু জৈৱিক কৃষিজাত সামগ্ৰীৰ বিক্ৰেতাসকলে অংশগ্ৰহণ কৰিব।
প্ৰধানমন্ত্ৰীয়ে প্ৰধানমন্ত্ৰী কিষাণ সন্মান নিধি যোজনাৰ ২১ সংখ্যক কিস্তি মুকলি কৰিব, যাৰ ফলত সমগ্ৰ দেশৰ ৯ কোটিৰো অধিক কৃষক উপকৃত হ’ব। এই সন্মিলনৰ লক্ষ্য হৈছে বহনক্ষম, পৰিৱেশ অনুকূল আৰু ৰাসায়নিক মুক্ত পদ্ধতি গ্ৰহণৰ প্ৰসাৰ আৰু দেশৰ কৃষি ভৱিষ্যতৰ বাবে জৈৱিক আৰু পুনৰুৎপাদনশীল কৃষিক এক কাৰ্য্যক্ষম, জলবায়ু অনুকূল, আৰু অৰ্থনৈতিকভাৱে বহনক্ষম আৰ্হি হিচাপে গ্ৰহণ ত্বৰান্বিত কৰা। তামিলনাডু জৈৱিক কৃষি সন্থাৰ উদ্যোগত এই সন্মিলনৰ আয়োজন কৰা হৈছে।
ইফালে প্ৰধানমন্ত্ৰী মোডীয়ে ১:২৫ বজাত কইম্বাটুৰ বিমানবন্দৰত উপস্থিত হ’ব । তাৰ পৰা তেওঁ গাড়ীৰে দুপৰীয়া ১:৩০ বজাত ক’ডিচিয়া এৰিনালৈ যাব। বিয়লি ৩:১৫ বজাত কইম্বাটুৰ বিমানবন্দৰলৈ উভতি যাব আৰু বিয়লি ৩:৩০ বজাত বিমানেৰে নতুন দিল্লীলৈ ৰাওনা হ’ব প্ৰধানমন্ত্ৰীগৰাকীয়ে। নিৰাপত্তাৰ স্বাৰ্থত ৩ হাজাৰ আৰক্ষী জোৱান মোতায়েন কৰিছে আৰক্ষীয়ে। মহানগৰীৰ কিছুমান বিশেষ পথত যাতায়তৰ পথ বাতিল কৰা হৈছে।
কইম্বাটুৰ বিমানবন্দৰত পাঁচ স্তৰৰ নিৰাপত্তা ব্যৱস্থা স্থাপন কৰা হৈছে। সমগ্ৰ ক’ডিচিয়া কেম্পাছ কেন্দ্ৰীয় ঔদ্যোগিক নিৰাপত্তা বাহিনীৰ নিয়ন্ত্ৰণত লোৱা হৈছে। কইম্বাটুৰ বিমানবন্দৰৰ পাৰ্কিং লটত বাহন পাৰ্কিং কৰাত নিষেধাজ্ঞা আৰোপ কৰা হৈছে।
প্ৰধানমন্ত্ৰীৰ কইম্বাটুৰ ভ্ৰমণৰ পৰিপ্ৰেক্ষিতত চিংগনাল্লুৰ, এছ আই এইচ এছ কলনী, চিন্নিয়মপালায়ম, নেহৰুনগৰ, কালাপট্টি, ক’ডিচিয়া ইনড’ৰ এৰিয়া আৰু ইয়াৰ আশে-পাশে থকা চিত্ৰ, পিলামেডু, সৰৱনমপট্টি, লক্ষ্মী মিলছ, ৰামনাথপুৰম, ৰেচকোৰ্চক অস্থায়ীভাৱে ‘ৰেড জ’ন’ হিচাপে ঘোষণা কৰা হৈছে। আৰক্ষীয়ে সোমবাৰৰ সন্ধিয়া ৭ বজাৰ পৰা বুধবাৰে সন্ধিয়া ৭ বজালৈ ড্ৰ’ন উৰণ নিষিদ্ধ কৰিছে। ইফালে, এআইএডিএমকেৰ সাধাৰণ সম্পাদক এদাপ্পাদি কে পলানিস্বামী আৰু টিএমএৰ নেতা জি.কে. ভাছান কইম্বাটুৰলৈ আহি আছে। জানিব পৰা মতে, প্ৰধানমন্ত্ৰী মোডীক সাক্ষাৎ কৰিব।
हिन्दुस्थान समाचार / অৰৱিন্দ
