ৱাশ্বিংটন, ১৬ নৱেম্বৰ (হি.স.)। ৰাষ্ট্ৰপতি ড’নাল্ড ট্ৰাম্পে ভেনিজুৱেলাৰ বিৰুদ্ধে সামৰিক অভিযান আৰম্ভ কৰিবলৈ প্ৰস্তুতিক লৈ সাজু হোৱাৰ ওপৰত আশ্বস্হ ব্যক্ত কৰে। ট্ৰাম্পে ভেনিজুৱেলাত ব্যৱস্থা লোৱাৰ সিদ্ধান্ত লৈছে।
পেন্টাগনৰ অপাৰেচন চাউদাৰ্ণ স্পিয়াৰৰ অংশ হিচাপে আমেৰিকাৰ সেনাই এই অঞ্চলত এক ডজনৰো অধিক যুদ্ধ জাহাজ আৰু ১৫ হাজাৰ সৈন্য মোতায়েন কৰিছে। চিএনএনৰ এক প্ৰতিবেদন অনুসৰি, সামৰিক বিষয়াসকলে এই সপ্তাহত ট্ৰাম্পক ভেনিজুৱেলাৰ ভিতৰত সামৰিক অভিযানৰ বিকল্পৰ বিষয়ে অৱগত কৰে। সম্প্ৰতি ট্ৰাম্পে ৰাষ্ট্ৰপতি নিকোলাছ মাদুৰোক উৎখাত কৰাৰ বাবে বৃহৎ অভিযান আৰম্ভ কৰাৰ বিপদ আৰু লাভৰ মূল্যায়ন কৰি আছে।
শুকুৰবাৰে ৰাষ্ট্ৰপতি ট্ৰাম্পে ইংগিত দিয়ে যে তেওঁ প্ৰব্ৰজনকাৰী আৰু অবৈধ ড্ৰাগছৰ প্ৰবাহ হ্ৰাস কৰাৰ লগতে শাসন ব্যৱস্থা পৰিৱৰ্তনৰ সম্ভাৱনাক আগুৱাই নিয়াৰ ওচৰ চাপিছে। এয়াৰ ফৰ্চ ৱানত থকা সাংবাদিকৰ আগত ট্ৰাম্পে কয় যে, মই মোৰ সিদ্ধান্ত লৈছো। কি হ’ব মই ক’ব নোৱাৰো, কিন্তু মই প্ৰায় সিদ্ধান্ত লৈছো যে ভেনিজুৱেলাৰ বিৰুদ্ধে ব্যৱস্থা গ্ৰহণ কৰা হ’ব।
ইয়াৰ পূৰ্বে বুধবাৰে যুদ্ধ সচিব পিট হেগছেথ আৰু যুটীয়া মুখ্য কৰ্মচাৰীৰ অধ্যক্ষ জেনেৰেল ডেন কেইনকে ধৰি এটা সৰু সামৰিক গোটে ৰাষ্ট্ৰপতিগৰাকীক সামৰিক বিকল্পৰ বিষয়ে অৱগত কৰে। আমেৰিকাৰ এজন বিষয়াৰ মতে, বিদেশ মন্ত্ৰী মাৰ্কো ৰুবিঅ’ আৰু অন্যান্য শীৰ্ষ বিষয়াকে ধৰি এটা বৃহৎ ৰাষ্ট্ৰীয় নিৰাপত্তা দলেও বৃহস্পতিবাৰে চিচুৱেশ্যন ৰুমত ট্ৰাম্পৰ সৈতে সাক্ষাৎ কৰে।
দুয়োখন বৈঠকতে ট্ৰাম্প আৰু তেওঁৰ দলটোৱে লক্ষ্য বিকল্পসমূহ পৰ্যালোচনা কৰে। বিষয়াসকলে ট্ৰাম্পক জনাইছে যে তেওঁলোকে তেওঁৰ পৰিকল্পনা কাৰ্যকৰী কৰিবলৈ সাজু। ভেনিজুৱেলাৰ সামৰিক বাহিনী, চৰকাৰী সংস্থাপন, ড্ৰাগছ সৰবৰাহৰ পথৰ বিৰুদ্ধে বিমান আক্ৰমণ চলাবলৈ আৰু মাদুৰোক পোনপটীয়াকৈ ক্ষমতাৰ পৰা আঁতৰাই পেলাবলৈ সাজু হৈছে আমেৰিকাৰ সেনাই।
অৱশ্যে শেহতীয়াকৈ ট্ৰাম্পে কয় যে তেওঁ ভেনিজুৱেলাৰ ভিতৰত আক্ৰমণৰ কথা চিন্তা কৰা নাই। যোৱা কেইটামান সপ্তাহত আমেৰিকাই ভেনিজুৱেলাত নিজৰ নৌসেনা মোতায়েন কৰিছে। ট্ৰাম্প প্ৰশাসনে ড্ৰাগছ সৰবৰাহৰ নাওত কমেও ২০টা ধৰ্মঘট চলোৱা বুলি জানিব পৰা গৈছে। চলিত সপ্তাহৰ আৰম্ভণিতে এই অঞ্চলত উপস্থিত হয় বিশ্বৰ সৰ্ববৃহৎ বিমানবাহী জাহাজ ইউ এছ এছ জেৰাল্ড আৰ ফৰ্ড।
আমেৰিকাই এই অঞ্চলত প্ৰায় ১৫ হাজাৰ সামৰিক জোৱান নিয়োগ কৰাৰ লগতে এক ডজনৰো অধিক যুদ্ধজাহাজো নিয়োগ কৰিছে। ইয়াৰ ভিতৰত আছে ক্ৰুজাৰ, ডেষ্ট্ৰয়াৰ, এয়াৰ এণ্ড মিছাইল ডিফেন্স কমাণ্ড জাহাজ, উভচৰ আক্ৰমণাত্মক জাহাজ, আক্ৰমণাত্মক চাবমেৰিন। ইয়াৰ উপৰিও প’ৰ্ট’ ৰিকোত ১০খন এফ-৩৫ যুঁজাৰু বিমান নিয়োগ কৰিছে।
চেণ্টাৰ ফৰ ষ্ট্ৰেটেজিক এণ্ড ইণ্টাৰনেশ্যনেল ষ্টাডিজৰ জ্যেষ্ঠ সহযোগী এৰিক ফাৰ্নছৱৰ্থে কয় যে, মই গতিৰ বাবে আচৰিত হৈছো, আৰু ই অভূতপূৰ্ব। এই শতিকাৰ আটাইতকৈ উল্লেখযোগ্য প্ৰস্তুতি। এই কথা বুজিবলৈ হ’লে ১৯৮৯ চনত পানামাত আমেৰিকাৰ আক্ৰমণৰ ইতিহাস বুজিব লাগিব।
ইফালে, ভেনিজুৱেলাই কয় যে তেওঁলোকে নিজৰ সামৰিক জোৱান, অস্ত্ৰ-শস্ত্ৰ, সঁজুলিও ব্যাপকভাৱে সঞ্চয় কৰি আছে। শুকুৰবাৰে কাৰাকাছৰ পৰা এক বিবৃতিত মাদুৰোৱে সকীয়াই দিয়ে যে আমেৰিকাৰ সামৰিক হস্তক্ষেপে আন এক গাজাৰ দৰে পৰিস্থিতিৰ সৃষ্টি কৰিব পাৰে।
ইফালে, বিশেষজ্ঞসকলে সকীয়াই দিছে যে ট্ৰাম্পে মাদুৰোক আঁতৰোৱাৰ লক্ষ্যৰে ভেনিজুৱেলাৰ ভিতৰত আক্ৰমণৰ নিৰ্দেশ দিলে গুৰুতৰ প্ৰত্যাহ্বানৰ সন্মুখীন হ’ব পাৰে।
हिन्दुस्थान समाचार
