গুৱাহাটী, ০৯ নৱেম্বৰ (হি.স.)। অ’ক্সফৰ্ড বিশ্ববিদ্যালয়ৰ ঐতিহাসিক জিছাছ কলেজৰ সভাগৃহত আজি গুঞ্জৰি উঠিল অসমৰ শাস্ত্ৰীয় নৃত্যশৈলী সত্ৰীয়া নৃত্যৰ ছন্দ, লয় আৰু ভাৱৰ সুৰ। “Echoes from the Monasteries: The World of Sattriya Dance” শীৰ্ষক এখন মনোমোহা বক্তৃতা-সহ নৃত্য প্ৰদৰ্শন অনুষ্ঠানত অংশ ল’লে উপস্থিত ছাত্র-ছাত্ৰী, গৱেষক আৰু কলাপ্ৰেমীসকলে। এই অনুষ্ঠানটো পৰিচালনা আৰু উপস্থাপনা কৰিলে অনন্যা মহন্তই, যি এগৰাকী ২৯ বছৰীয়া দক্ষ দক্ষিণ এছিয়ান নৃত্যশিল্পী আৰু মুভমেন্ট আৰ্টিষ্ট। মহন্তই গত ২৫ বছৰৰ অধিক সময় ধৰি সত্ৰীয়া নৃত্যৰ সাধনা, অধ্যয়ন আৰু সংৰক্ষণত নিজকে সমৰ্পণ কৰিছে। তেওঁৰ বক্তৃতা আৰু নৃত্য প্ৰদৰ্শনৰ যোগসূত্ৰত, অংশগ্ৰহণকাৰীসকলে সত্ৰীয়াৰ মৌলিক দিশসমূহ – মাটি আখোৰা (ভূমি অনুশীলন), নৱ ৰস (নবভাৱ), ভৰিমন (পাদচালনাৰ ভংগী) আৰু হস্ত (হস্তমুদ্রা) সম্পৰ্কে জানিবলৈ সুযোগ পালে। অনুষ্ঠানটোত অনন্যাই পৰ্যায়ক্রমে তিনিটা নৃত্যাংশ উপস্থাপন কৰি সত্ৰীয়াৰ আধ্যাত্মিক গাম্ভীৰ্য, ৰসনাত্মক বৈচিত্র্য আৰু কলাগত সূক্ষ্মতা সুন্দৰভাৱে প্ৰতিফলিত কৰিলে। এই অনুষ্ঠানটো অ’ক্সফৰ্ড হিন্দু ছ’ছাইটি আৰু অ’ক্সফৰ্ড চেন্টাৰ ফৰ হিন্দু ষ্টাডিজৰ যৌথ উদ্যোগত আয়োজিত হৈছিল, যিটো অ’ক্সফৰ্ড বিশ্ববিদ্যালয়ৰ জিছাছ কলেজত অনুষ্ঠিত হয়। অনুষ্ঠানটো শেষ হয় অ’ক্সফৰ্ড হিন্দু ছ’ছাইটিৰ সভাপতি অভিৰাজ সিঙৰ ধন্যবাদ জ্ঞাপনৰে। তেওঁ মন্তব্য কৰে, “সত্ৰীয়া নৃত্য প্ৰথমবাৰ চোৱাৰ এটা অনন্য অভিজ্ঞতা আছিল। অনন্যাই সম্পূৰ্ণ ঘণ্টাটোৰ অনুষ্ঠানটোক এনে শ্ৰদ্ধা, ভাৱনা আৰু সৌন্দৰ্যৰে উপস্থাপন কৰিলে — ই সত্যেই প্ৰেৰণাদায়ক। তেওঁৰ আগন্তুক যাত্ৰাৰ বাবে শুভকামনা।” অনন্যা মহন্তৰ এই প্ৰদৰ্শন আৰু ব্যাখ্যা পণ্ডিত, ছাত্র-ছাত্ৰী আৰু কলাপ্ৰেমীসকলৰ পৰা গভীৰ প্ৰশংসা লাভ কৰে। সত্ৰীয়াৰ আধ্যাত্মিক আৰু সাংস্কৃতিক মূলকথা একাডেমিক পৰিবেশত যি ভাৱে জীৱন্ত কৰি তোলা হৈছিল, ই ভাৰতীয় সত্ৰ সংস্কৃতি আৰু বিশ্বজনীন কলাসমাজৰ মাজত এটা অমূল্য সেতু স্থাপন কৰিলে।
হিন্দুস্থান সমাচাৰ / মনোজ কুমাৰ শইকীয়া
