গুৱাহাটী, ৩০ ছেপ্টেম্বৰ (হি.স.)। বিশ্ব বিশ্ৰুত কণ্ঠশিল্পী জুবিন গাৰ্গ, ১৯ ছেপ্টেম্বৰ অভিশপ্ত দিনটোতে আকস্মিক দুৰ্ঘটনাৰ সম্মুখীন হৈ মৃত্যুক আঁকোৱালি ললে। তেখেত কায়িকভাৱে আমাৰ মাজত নথকা ১৩ দিনেই হল।
প্ৰয়াত জুবিন গাৰ্গৰ পৱিত্ৰ আত্মাৰ চিৰশান্তি কামনা কৰি অহা ১ অক্টোবৰত যোৰহাট জিলাৰ ক্ৰীড়া সন্থাৰ খেল পথাৰত ৰাজহুৱা মাংগলিক কাৰ্য আয়োজন কৰা হৈছে। আজি ৰাজ্যিক বিজেপিৰ মুখ্য কাৰ্যালয় অটল বিহাৰী বাজপেয়ী ভৱনৰ পৰা সংবাদ মাধ্যমলৈ প্ৰেৰণ কৰা এক প্ৰেছ বিবৃতিত কয় যে অসম চৰকাৰৰ সমৰ্থনত যোৰহাট জিলা প্ৰশাসন আৰু স্থানীয় ৰাইজৰ সহযোগত ইতিমধ্যে মাংগলিক কাৰ্যৰ প্ৰতিটো দিশেই সম্পূৰ্ণ হৈ উঠিছে। প্ৰতিজন ব্যক্তিয়েই যাতে প্ৰশাসনক সহযোগ কৰি এজন জুবিন অনুৰাগী হিচাপে উক্ত অনুষ্ঠানত থাকে তাৰ বাবে ৰাজ্যিক বিজেপিয়ে বিনম্ৰতাৰে অনুৰোধ জনালোঁ। বিবৃতিটোত লগতে কয় যে জুবিন গাৰ্গৰ কেৱল এক শিল্পী হিচাপে পৰিচিত নাছিল তেখেত আছিল জনতাৰ কণ্ঠ, দৰিদ্ৰ জনৰ সহায়ৰ হাত অসমৰ এক উজ্বল ৰত্ন।
সেয়ে তেখেতক অকালতে হেৰুৱাই প্ৰতিজন অসমীয়াই শোকত ভাগি পৰিছে। এই মৃত্যুত জড়িত প্ৰতি গৰাকী দোষীয়েই যাতে উপযুক্ত শাস্তি লাভ কৰে তাৰ বাবে মুখ্যমন্ত্ৰী ড০ হিমন্ত বিশ্ব শৰ্মা নেতৃত্বাধীন অসম চৰকাৰে বিষয়টোত তীক্ষ্ণ দৃষ্টি ৰাখিছে। আমি আশাবাদী প্ৰকৃত দোষীয়ে শাস্তি পোৱাৰ লগতে মৃতকৰ পৰিয়ালে উচিত ন্যায় পাব।
হিন্দুস্থান সমাচাৰ / আলোক চক্ৰৱৰ্তী
