পুৰ্ব সিংভূম, ২৭ আগষ্ট (হি.স.)। বিস্তুপুৰৰ ছাৰ দোৰাবজী টাটা পাৰ্কত ছাৰ দোৰাবজী টাটাৰ জন্ম জয়ন্তী উপলক্ষে অনুষ্ঠিত হোৱা এক শ্ৰদ্ধাঞ্জলি অনুষ্ঠানত টাটা ষ্টীলৰ এম ডি আৰু চিইঅ’ টিভি নৰেন্দ্ৰনে কয় যে আমেৰিকাৰ ৫০ শতাংশ আমদানি শুল্কই টাটা ষ্টীলৰ ভাৰতীয় ইউনিটসমূহৰ ওপৰত কোনো প্ৰত্যক্ষ প্ৰভাৱ নপৰে।
নৰেন্দ্ৰনে কয় যে টাটা ষ্টীলে ভাৰত বা জামছেদপুৰৰ পৰা আমেৰিকালৈ তীখা ৰপ্তানি নকৰে, বৰঞ্চ ইউৰোপৰ কাৰখানাৰ পৰা আমেৰিকাৰ বজাৰলৈ ৰপ্তানি কৰে, য’ত কিছু প্ৰভাৱ সম্ভৱপৰ।
নৰেন্দ্ৰনে লগতে কয় যে ভাৰতত তীখাৰ ঘৰুৱা চাহিদা দ্ৰুতগতিত বৃদ্ধি পাইছে আৰু চৰকাৰে চলাই থকা অৰ্থনৈতিক সংস্কাৰ – যেনে জি এছ টিৰ পৰিৱৰ্তন আৰু নীতি সংস্কাৰ – ভাৰতৰ অৰ্থনীতি আৰু অধিক শক্তিশালী কৰি তুলিছে। যদিও তেওঁ স্বীকাৰ কৰে যে আমেৰিকাৰ শুল্কই বস্ত্ৰ, গহণা আৰু ৰত্ন উদ্যোগত প্ৰভাৱ পেলাব পাৰে, তথাপিও ভাৰত চৰকাৰে ইয়াৰ সৈতে মোকাবিলা কৰিবলৈ অবিৰত বৈঠক অনুষ্ঠিত কৰি আছে আৰু উপযুক্ত সমাধান বিচাৰি উলিওৱা হৈছে।
এই উপলক্ষে টাটা ষ্টীলৰ এম ডিয়ে কয় যে কোম্পানীটোৱে যোৱা ১১৯ বছৰ ধৰি দেশৰ সেৱা আগবঢ়াই আহিছে আৰু ভৱিষ্যতেও তেনেকৈয়ে সেৱা আগবঢ়াই যাব। তেওঁ কয় যে টাটা ষ্টীলে হাইড্ৰজেনৰ ব্যৱহাৰক প্ৰসাৰিত কৰাৰ বাবেও প্ৰচেষ্টা চলাইছে যাতে পৰিৱেশ অনুকূল উৎপাদন বৃদ্ধি কৰিব পৰা যায়।
ছাৰ ডোৰাবজী টাটাৰ জন্ম বাৰ্ষিকীত শ্ৰদ্ধাঞ্জলি জনাবলৈ অহা সকলো লোকে ছাৰ ডোৰাবজী টাটাৰ প্ৰতিমূৰ্তিত পুস্পাঞ্জলিৰে শ্ৰদ্ধাঞ্জলি জ্ঞাপন কৰাৰ লগতে তেওঁৰ অৱদানক প্ৰণাম জনায়। বক্তাসকলে তেওঁৰ জীৱনৰ পৰা প্ৰেৰণা লোৱাৰ প্ৰয়োজনীয়তাৰ ওপৰত গুৰুত্ব আৰোপ কৰি তেওঁক এজন প্ৰকৃত জাতীয় সেৱক বুলি অভিহিত কৰে, যিয়ে প্ৰতিকূল পৰিস্থিতিতো দেশৰ বাবে উদ্যোগ আৰু সুযোগ সৃষ্টি কৰিছিল।
টাটা ষ্টীলৰ প্ৰাক্তন ডেপুটি এম ডি ডাঃ টি মুখাৰ্জী, টাটা ৱৰ্কাৰছ ইউনিয়নৰ সভাপতি সঞ্জীৱ চৌধুৰী টুন্নু, টাটা ষ্টীলৰ এম ডি ইউ আই এছ এল ঋতুৰাজ সিনহা, মুখ্য জন বিষয়া অত্ৰাই সন্যাল, উপ সভাপতি পীয়ুষ গুপ্তা, ইউনিয়নৰ সাধাৰণ সম্পাদক সতীশ সিং, উপ সভাপতি শ্বাহনৱাজ আলম, সঞ্জীৱ তিৱাৰী, সঞ্জয় সিং, ৰাজীৱ চৌধুৰী, কোষাধ্যক্ষ অনুষ্ঠানত আমোদ ডুবে, সহকাৰী সম্পাদক নিতেশ ৰাজ, অজয় চৌধুৰী আৰু শ্যামাবাবু উপস্থিত থাকে।
हिन्दुस्थान समाचार / মনোজ কুমাৰ শইকীয়া
