দক্ষিণ শালমাৰা মানকাচৰ, ০৪ আগষ্ট (হি.স.)। ব্ৰহ্মপুত্ৰ নদীৰ ভয়ংকৰ খহনীয়াৰ স্থায়ী প্ৰতিৰোধৰ দাবী জনাই হাটশিঙিমাৰীত জিলা কংগ্ৰেছৰ অনিৰ্দিষ্টকালীন অৱস্থান ধৰ্মঘটৰ আজি চতুৰ্থ দিন। বাংলাদেশ সীমান্তবৰ্তী কোকৰাডাঙ্গাকে ধৰি মানকাচৰৰ বিভিন্ন প্ৰান্তত চলি থকা খহনীয়াৰ স্থায়ী প্ৰতিৰোধৰ দাবী জনাই ১ আগষ্টৰ পৰা জিলা কংগ্ৰেছ অনিৰ্দিষ্ট কালৰ বাবে অৱস্থান ধৰ্মঘটত বহিছে।
উল্লেখ্য় যে মানকাচৰ বাংলাদেশ সীমান্তবৰ্তী কোকৰাডাঙ্গাৰ লগতে জিলা খনৰ বিভিন্ন ঠাইত কিছদিনৰ পৰা ব্ৰহ্মপুত্ৰ নদীৰ ভয়ংকৰ খহনীয়া চলি আছে। বিশেষকৈ কোকৰাডাঙ্গাত খহনীয়াই আন্তৰাষ্ট্ৰীয় সীমান্ত সংযোগী পথ আৰু সীমান্তৰ কাঁইটীয়া তাৰৰ প্ৰতি ভাবুকি আনিছে। খহনীয়াৰ স্থায়ী প্ৰতিৰোধ নহলে ব্ৰহ্মপুত্ৰৰ বুকুত জাহ যাব মথাউৰীসদৃশ সীমান্ত সংযোগী পথ। ফলত মানকাচৰৰ বৃহত্তৰ এলেকাৰ কৃষকৰ ভূমি জলমগ্ন হৈ পৰিব। সীমান্তত খহনীয়াই দিনক দিনে ভয়ঙ্কৰ পৰিস্থিতিৰ সৃষ্টি কৰাৰ পাছতো জিলা প্ৰশাসন আৰু চৰকাৰে লোৱা নাই উপযুক্ত ব্যৱস্থা। ফলত ১ আগষ্টৰ পৰা জিলা কংগ্ৰেছ অনিৰ্দিষ্ট কালৰ বাবে অৱস্থান ধৰ্মঘটত বহিছে।
জিলা প্ৰশাসন আৰু চৰকাৰৰ বিৰুদ্ধে উত্তাল শ্লোগান দি প্ৰতিবাদ কৰিছে জিলা কংগ্ৰেছ ৷ প্ৰাক্তন বিধায়ক তথা জিলা সভাপতি ডাক্তৰ মতিউৰ ৰহমান মণ্ডলও এই অৱস্থান ধৰ্মঘটত বহিছে ৷ চৰকাৰ আৰু জিলা প্ৰশাসনে স্থায়ী প্ৰতিৰোধৰ আশ্বাস নিদিয়ালৈ জিলা কংগ্ৰেছে ধৰ্মঘট চলাই যাব বুলি দাবী কৰিছে জিলা কংগ্ৰেছে ৷
—————
হিন্দুস্থান সমাচাৰ / প্ৰকাশ ডেকা
