জুৰিখ, ২৪ জুলাই (হি.স.)। আইতানা বোনমাটিৰ অতিৰিক্ত সময়ৰ চমৎকাৰ গ’লে বুধবাৰে জাৰ্মানীক ১-০ গ’লত পৰাস্ত কৰি স্পেইনে প্ৰথমবাৰৰ বাবে মহিলা ইউৰোপীয় চেম্পিয়নশ্বিপৰ ফাইনেলত প্ৰৱেশ কৰে। এই জয়ৰ লগে লগে স্পেইনে এতিয়া দেওবাৰে ফাইনেলত ডিফেণ্ডিং চেম্পিয়ন ইংলেণ্ডৰ বিৰুদ্ধে খেলিব, য’ত স্পেইনে প্ৰথমবাৰৰ বাবে বিশ্ব খিতাপ দখল কৰে।
খেলখনৰ একমাত্ৰ গ’লটো ১১৩ মিনিটত বোনমাটিয়ে দিয়ে। বাওঁফালৰ ফ্লেংকত বলটো লাভ কৰি ওচৰৰ পোষ্টত জাৰ্মান গ’লৰক্ষক এন-কেট্ৰিন বাৰ্গাৰে এৰি থৈ যোৱা এটা ফাঁক বিচাৰি পাই টাইট এংগেলৰ পৰা নেটত শক্তিশালী শ্বট এটা মাৰিলে। প্ৰথমাৰ্ধত স্পেইনৰ অধিনায়ক আইৰিন পেৰেডছেও হেডাৰেৰে গ’ল দিবলৈ চেষ্টা কৰিছিল যদিও তেওঁৰ শ্বটটো পোষ্টত খুন্দা মাৰি বাহিৰলৈ ওলাই যায়। গোটেই মেচখনত স্পেইনে দখলত প্ৰান্ত বজাই ৰখাৰ বিপৰীতে জাৰ্মানীয়ে শক্তিশালী ৰক্ষণশীল দেৱাল নিৰ্মাণ কৰি পাল্টা আক্ৰমণৰ কৌশল ব্যৱহাৰ কৰে।
গোটেই খেলখনত জাৰ্মানীৰ উইংগাৰ ক্লাৰা বুয়েলে আকৰ্ষণীয় প্ৰদৰ্শন আগবঢ়ায়। ৬৩ মিনিটত স্পেইনৰ ডিফেন্সক ডজ কৰি গ’লৰ ওচৰ চাপিছিল যদিও তেওঁৰ শ্বটটো পোনে পোনে গ’লৰক্ষক কাটা কলৰ হাতত পৰে। বুয়েলে ষ্টপেজ টাইমত সংকীৰ্ণভাৱে ৰক্ষা কৰা এটা ডিফ্লেক্টেড শ্বট কলও কৰিছিল আৰু মেচখন ০–০ গ’লত অতিৰিক্ত সময়লৈ গৈছিল। ইউৰো ছেমি ফাইনেলত এতিয়ালৈকে ১০ বাৰৰ ভিতৰত ৯ বাৰ জয়ী হৈছে জাৰ্মানীয়ে। জাৰ্মানীয়ে পেনাল্টি শ্বুটআউটৰ দিশে আগবাঢ়িব যেন লাগিছিল যদিও বনমাটিয়ে তেওঁলোকৰ আশাক ম্লান কৰি পেলালে। এই গ’লটো বনমাটিৰ বাবে আৰু অধিক বিশেষ আছিল, কিয়নো প্ৰতিযোগিতা আৰম্ভ হোৱাৰ পূৰ্বে মেনিনজাইটিছৰ সৈতে জড়িত স্বাস্থ্যজনিত সমস্যাৰ সৈতে যুঁজি আছিল। স্পেইনৰ বাবে এই জয় ঐতিহাসিক আছিল, কিয়নো এইটোৱেই আছিল প্ৰথমবাৰৰ বাবে জাৰ্মানীক ডাঙৰ প্ৰতিযোগিতাত পৰাস্ত কৰা।
মেচৰ পিছত বনমাটিয়ে কয়, মই গৌৰৱ অনুভৱ কৰিছো। আমি এক ডাঙৰ চেম্পিয়নশ্বিপ খেলিছো। আজি আমি জাৰ্মানীৰ বিৰুদ্ধে অলপ সংগ্ৰাম কৰিলোঁ, কিন্তু শেষত আমি জয়ী হ’লোঁ। এইটো প্ৰথমবাৰৰ বাবে আমি জাৰ্মানীক ডাঙৰ প্ৰতিযোগিতাত পৰাস্ত কৰিলোঁ, ইয়াতকৈ ডাঙৰ কৃতিত্ব কি হ’ব পাৰে।
কোৱাৰ্টাৰ ফাইনেলত ফ্ৰান্সৰ বিৰুদ্ধে শ্বুটআউটত নিজৰ দলটোক জয়ৰ দিশত আগুৱাই নিয়া জাৰ্মান গ’লৰক্ষক এন-কেট্ৰিন বাৰ্গাৰে এই পৰাজয়ৰ দায়িত্ব লয়। তেওঁ কয়, সেই গ’লৰ বাবে মই দোষী। ওচৰৰ পোষ্টটো কভাৰ কৰিবলগীয়া হৈছিল আৰু সেইবাবেই মই নিজৰ ওপৰত অতি হতাশ। মই যিমানেই ছেভ নকৰোঁ কিয়, সেই গ’লটো বন্ধ কৰাটো মোৰ কৰ্তব্য আছিল।
এতিয়া সকলোৰে দৃষ্টি দেওবাৰে অনুষ্ঠিত হ’বলগীয়া চূড়ান্ত মেচখনৰ ওপৰত, য’ত স্পেইন আৰু ইংলেণ্ডৰ মাজত আন এক ঐতিহাসিক সংঘৰ্ষ দেখা যাব।
हिन्दुस्थान समाचार / মনোজ কুমাৰ শইকীয়া
