নতুন দিল্লী, ১২ জুলাই (হি.স.)। কেন্দ্ৰীয় অসামৰিক বিমান পৰিবহণ মন্ত্ৰী কিঞ্জৰাপু ৰাম মোহন নাইডুৱে শনিবাৰে কয় যে ১২ জুনত আহমেদাবাদত সংঘটিত হোৱা এয়াৰ ইণ্ডিয়াৰ বিমান দুৰ্ঘটনা সম্পৰ্কে বিমান দুৰ্ঘটনা অনুসন্ধান ব্যুৰোৰ (এএআইবি) প্ৰতিবেদন প্ৰাথমিক তথ্যৰ ভিত্তিত প্ৰস্তুত কৰা হৈছে। ইয়াৰ চূড়ান্ত প্ৰতিবেদন প্ৰকাশ নোহোৱালৈকে কোনো সিদ্ধান্তত উপনীত হ’বলৈ খৰখেদা কৰিব নালাগে।
এএআইবিৰ প্ৰতিবেদনৰ প্ৰতিক্ৰিয়াত নাইডুৱে সংবাদ মাধ্যমৰ আগত কয় যে, আমি অপেক্ষা কৰা উচিত। এইটো এটা প্ৰাৰম্ভিক প্ৰতিবেদন। আমি ইয়াক মন্ত্ৰালয়ত বিশ্লেষণ কৰি আছো। মই ভাবো যে চূড়ান্ত প্ৰতিবেদন অহাৰ পিছতহে আমি ইয়াৰ ওপৰত মন্তব্য কৰিলে ভাল হ’ব। আহমেদাবাদৰ বিমান দুৰ্ঘটনাৰ চূড়ান্ত প্ৰতিবেদন প্ৰকাশ পোৱাৰ পিছত এই দুৰ্ঘটনাত প্ৰাণ হেৰুওৱা লোকসকলৰ পৰিয়ালে ন্যায় লাভ কৰিব বুলি অসামৰিক বিমান পৰিবহণ মন্ত্ৰীগৰাকীয়ে আশ্বাস দিয়ে। প্ৰাথমিক তদন্তৰ প্ৰতিবেদনৰ ভিত্তিত কোনো সিদ্ধান্তত উপনীত নহ’বলৈ জনসাধাৰণ আৰু সংবাদ মাধ্যমক আহ্বান জনায়। চূড়ান্ত প্ৰতিবেদনত সমগ্ৰ সত্য উন্মোচিত হ’ব বুলি তেওঁ গুৰুত্ব আৰোপ কৰে।
বিমান দুৰ্ঘটনাৰ তদন্ত কৰা সংস্থা এএআইবিয়ে ১৩ জুনত এই বিমান দুৰ্ঘটনাৰ তদন্ত আৰম্ভ কৰিছিল।তদন্তকাৰী সংস্থাটোৱে এমাহৰ পিছত এক প্ৰাৰম্ভিক প্ৰতিবেদন প্ৰকাশ কৰি কয় যে বিমানখন উৰণৰ কিছু মুহূৰ্তৰ ভিতৰতে দুয়োটা ইঞ্জিন বন্ধ হৈ যায় আৰু ইন্ধন কাটঅফ চুইচবোৰ প্ৰায় একে সময়তে, এক চেকেণ্ডৰ ব্যৱধানত ‘ৰান’ৰ পৰা ‘কাটঅফ’লৈ গতি কৰে। এএআইবিৰ ১৫ পৃষ্ঠাৰ প্ৰতিবেদনত উল্লেখ কৰা হৈছে যে বিমানখনৰ উৰণৰ কেইছেকেণ্ডমানৰ পিছত হঠাতে নিজাববীয়াকৈ বন্ধ হৈ পৰে আৰু ৩০ ছেকেণ্ডৰ ভিতৰতে বিমানখন দুৰ্ঘটনাগ্ৰস্ত হয়।
हिन्दुस्थान समाचार / মনোজ কুমাৰ শইকীয়া
