জাগ্ৰেব, ১৯ জুন (হি.স.)। ভাৰতৰ প্ৰধানমন্ত্ৰী নৰেন্দ্ৰ মোদীয়ে বুধবাৰে জাগ্ৰেবৰ ঐতিহাসিক বান্সস্কি দ্বোৰী প্ৰাসাদত ক্ৰ’ৱেচিয়াৰ প্ৰধানমন্ত্ৰী আন্দ্ৰাজ প্লেংকভিচক সাক্ষাৎ কৰে। এয়া ভাৰতৰ কোনো প্ৰধানমন্ত্ৰীৰ ক্ৰ’ৱেচিয়ালৈ প্ৰথম আনুষ্ঠানিক ভ্ৰমণ, যিয়ে দুয়োখন দেশৰ কৌশলগত অংশীদাৰিত্বক এক নতুন মাত্ৰা প্ৰদান কৰিছে।
প্ৰধানমন্ত্ৰী মোদী ক্ৰ’ৱেচিয়াত উপস্থিত হোৱাৰ লগে লগে প্ৰধানমন্ত্ৰী প্লেংকভিচে নিজেই বিমানবন্দৰলৈ গৈ তেওঁক উষ্ম আদৰণি জনায়। ইয়াৰ পিছতে প্ৰধানমন্ত্ৰী মোডীক এক ভৱ্য আনুষ্ঠানিক আদৰণি অনুষ্ঠানত গাৰ্ড অৱ অনাৰ প্ৰদান কৰা হয়।
বৈঠকত দুয়োগৰাকী নেতাই বাণিজ্য, বিনিয়োগ, বিজ্ঞান আৰু প্ৰযুক্তি, প্ৰতিৰক্ষা, সংস্কৃতি আৰু শিক্ষা আদি বিভিন্ন ক্ষেত্ৰত দ্বিপাক্ষিক সহযোগিতা গভীৰ কৰাৰ ওপৰত গভীৰ আলোচনা কৰে। আন্তঃগাঁথনি, বন্দৰ, ডিজিটেলাইজেশ্যন, কৃত্ৰিম বুদ্ধিমত্তা (এআই), ফাৰ্মা, নবীকৰণযোগ্য শক্তি আৰু পৰ্যটন আদি ক্ষেত্ৰত অংশীদাৰিত্ব শক্তিশালী কৰাৰ বাবে এক চুক্তিত উপনীত হয়।
ভাৰতৰ দক্ষ মানৱ সম্পদ ক্ষমতাৰ কথা উল্লেখ কৰি প্ৰধানমন্ত্ৰী মোদীয়ে গতিশীলতা আৰু দক্ষতা বিকাশৰ ক্ষেত্ৰত প্ৰতিষ্ঠানিক সহযোগিতাৰ পৰামৰ্শ আগবঢ়ায়। ভাৰত-মধ্যপ্ৰাচ্য-ইউৰোপ অৰ্থনৈতিক কৰিডৰ (আইএমইইচি)ৰ অধীনত সংযোগ বৃদ্ধিৰ বাবেও দুয়োখন দেশে সন্মতি প্ৰকাশ কৰে।
আলোচনাৰ সময়ত ৰাষ্ট্ৰসংঘ আৰু বিশ্বৰ প্ৰতিষ্ঠানসমূহৰ সংস্কাৰ, জলবায়ু পৰিৱৰ্তন আৰু সন্ত্ৰাসবাদ আদি বিষয়ৰ ওপৰত মত বিনিময় কৰা হয়। সন্ত্ৰাসবাদৰ বিৰুদ্ধে ক্ৰ’ৱেচিয়াক সহযোগিতা আগবঢ়োৱাৰ বাবে ভাৰতে ধন্যবাদ জ্ঞাপন কৰে।
এই উচ্চ পৰ্যায়ৰ বৈঠকৰ সময়ত কৃষি খণ্ডত সহযোগিতা, বিজ্ঞান আৰু প্ৰযুক্তিবিদ্যাৰ গৱেষণা সহযোগিতা, সংস্কৃতিৰ ক্ষেত্ৰত অংশীদাৰিত্ব আৰু ক্ৰ’ৱেচিয়াত হিন্দী চকী নবীকৰণৰ ওপৰত চাৰিটা গুৰুত্বপূৰ্ণ বুজাবুজি চুক্তি স্বাক্ষৰিত হয়।
একে সময়তে প্ৰধানমন্ত্ৰী মোদীয়ে আন্তঃৰাষ্ট্ৰীয় যোগ দিৱস উপলক্ষে ক্ৰ’ৱেচিয়াত যোগপ্ৰেমীসকলক সম্ভাষণ জনাই দুয়োখন দেশৰ সভ্যতামূলক অংশীদাৰিত্বৰ প্ৰশংসা কৰে।
উল্লেখযোগ্য যে ১৯৯২ চনত ভাৰত আৰু ক্ৰ’ৱেচিয়াৰ মাজত কূটনৈতিক সম্পৰ্ক স্থাপন হৈছিল। এই ঐতিহাসিক ভ্ৰমণে দুয়োখন দেশৰ পাৰস্পৰিক সম্পৰ্কত নতুন শক্তি আৰু বিশ্বাসৰ সৃষ্টি কৰিছে।
হিন্দুস্থান সমাচাৰ / মনোজ কুমাৰ শইকীয়া
