শোণিতপুৰ, ৩০ নৱেম্বৰ (হি.স.)। গুৰুজনাৰ অমৰ সৃষ্টি এই কেলি গোপাল নাটৰ জৰিয়তে ভগৱান আৰু ভক্তৰ মাজৰ প্ৰেম বান্ধোনৰ সম্পৰ্কক আধ্যাত্মিকভাবে দৰ্শোৱা এক উৎসৱ ৰাসক্ৰীড়া তেজপুৰৰ গাতে লাগি থকা মাজগাঁও বৰ নামঘৰত ৰাসৰ সফল সমাপ্তি ঘটে। পূৰ্ণিমাৰ বিতোপন নিশাৰ জোনাকত ভগৱান শ্ৰীকৃষ্ণৰ এই ৰাসলীলাৰ প্ৰথম নিশা শ্ৰী কৃষ্ণৰ ভাওত ভাৰ্গৱ কলিতা আৰু অৰ্পন দত্ত বৰুৱা বিপৰীতে ৰাধাৰ ভাওত সুদৰ্শনা কলিতা আৰু পৰিশ্মিতা দাস অভিনয় কৰে । প্ৰথম নিশা মূল নাটৰ প্ৰাকক্ষণত ময়ূৰ কাঞ্চন বৰা ৰচিত আৰু বিশিষ্টা নৃত্য শিল্পী মিতালী দত্ত বৰঠাকুৰৰ পৰিচালনাত মঞ্চায়ন হয় মধুৰু মুৰ্তি মুৰাৰো ।
ন-পুৰণি দুকুৰিৰো অধিক শিশু – কিশোৰীয়ে অংশ লোৱা নৃত্য নাটিকাত গীতে মাতে সজাই তোলে প্ৰীতম নাথ, মৰমী কলিতা, তমন্না তামুলীয়ে, বাদ্য যন্ত্ৰত সংগত কৰে যোগেন হাজৰিকা, ৰূপম কাকতি, হীৰকজ্যোতি নাথ, চন্দন প্ৰতীম বৰা আৰু ঘোষক ভাওনা শিল্পী সত্যজিত ভূঞাই। পষেক জোৰা প্ৰস্তুতিৰে আজি পুৱতি নিশা সামৰণি পৰা ৰাস মাজগাঁও বৰনামঘৰত ১৯৯৩ ৰ পৰা মহাৰাস অনুষ্ঠিত হৈ আহিছে। ১৮ শতিকাৰ শেষ ভাগত স্থাপিত মাজগাঁও বৰনামঘৰৰ মহা ৰাস উদযাপনৰ বাবে পৰিচালনা সমিতিয়ে নামঘৰ চৌহদত সজাই পৰাই তোলা হয়। মাজগাঁও গোপিনী সমাজৰ উদ্যোগত অনুষ্ঠিত কৰা ৰাসৰ প্ৰথম দিনা পুৱা নাম প্ৰসংগ কৰাৰ লগতে বিয়লি বন্তি প্ৰজ্বলনৰে শুভাৰম্ভ কৰে শোণিতপুৰৰ অতিৰিক্ত আয়ুক্ত কৰবী কাকতি কোঁৱৰে।
ইফালে অসম চৰকাৰে আগবঢ়োৱা পঁচিশ হাজাৰ টকাৰ নামঘৰত উপস্থিত হৈ চেক প্ৰদান কৰি সাংসদ পল্লৱ লোচন দাসে গুৰুজনাৰ সৃষ্টিৰাজিৰ মাজৰে কৃষ্টি জীয়াই ৰখাৰ আহ্বান জনায়। সমাজ এখন সু পৰিচালনা আৰু ধৰি ৰখাত নামঘৰৰ অনবদ্য অৰিহণা থকা বুলি কয়। অসমৰ মুখ্যমন্ত্ৰী ড০ হিমন্ত বিশ্ব শৰ্মাৰ নেতৃত্বত এইবেলি ৰাস সমিতি সমুহক অনুদান আগবঢ়োৱা বুলি কয়। ইফালে দ্বিতীয় নিশা মহাৰাসত শ্ৰী কৃষ্ণৰ ভাওত উদয় কলিতা আৰু প্ৰিয়ংকা শইকীয়া, পুতনাৰ ভাওত পাপু, মোহিনী তৃপ্তিটিনা তামুলী, সৰু কৃষ্ণ সুকন্যা দাস, বক চৰাই উমা কান্ত বৰা, শংখচূড় নিলভ শইকীয়া আৰু সুত্ৰধাৰী যাদব চন্দ্ৰ নাথে অভিনয় কৰে ।
ইপিনে পোহৰত প্ৰদীপ ডেকা, শব্দত ভাইটি ভৰালী দৃশ্য সজ্জাত উমাকান্ত বৰাই নামঘৰ সজাই পৰাই তোলা দৃশ্যই উপস্থিত ৰাইজক আপ্লুত কৰে। এই নাট পৰিচালনা কৰে গনেশ বৰুৱাই। অঞ্চলটোৰ প্ৰায় ডেৰশ গোপীয়ে অংশ গ্ৰহন কৰি নামঘৰ চৌহদ ভক্তিমূলক নৃত্য গীতৰে মুখৰিত কৰি তোলা পৰিবেশে উজাগৰী নিশা কটোৱা সহস্ৰাধিক ৰাইজে সন্তোষ প্ৰকাশ কৰে।
এই অনুষ্ঠানতে নামঘৰ পৰিয়ালৰে নিতুল বৰাই সদৌ অসম ছাত্ৰ সন্থাৰ সহকাৰী সম্পাদকৰ পদত অধিষ্ঠিত হোৱাৰ বাবে প্ৰথম দিনা নামঘৰত আশীষ প্ৰদান কৰে।
হিন্দুস্থান সমাচাৰ/সমীৰ/মনোজ
