-শান্তি, নিৰাপত্তা আৰু সম্প্ৰীতিৰ পৰিৱেশত পালন কৰা হ’ব এই উৎসৱ
– মুখ্যমন্ত্ৰী যোগীৰ দীপোৎসৱ, হনুমান জয়ন্তী, দীপাৱলী আদি উৎসৱৰ সুকলমে আয়োজনৰ বাবে নিৰ্দেশনা
অযোধ্যা, ০৬ নৱেম্বৰ (হি.স.)। উত্তৰ প্ৰদেশৰ শ্ৰী অযোধ্যাত মুখ্যমন্ত্ৰী যোগী আদিত্যনাথৰ নেতৃত্বত উদযাপন কৰা দীপোৎসৱত পুনৰবাৰ বিশ্ব অভিলেখ গঢ়িবলৈ প্ৰস্তুতি অব্যাহত আছে। ২১ লাখ বন্তিৰে অৱধপুৰীক আলোকিত কৰাৰ প্ৰস্তুতি চলি আছে।
মুখ্যমন্ত্ৰী যোগী আদিত্যনাথে প্ৰশাসনিক আৰু আৰক্ষী বিষয়াৰ সৈতে হোৱা বৈঠকত এই সন্দৰ্ভত প্ৰয়োজনীয় নিৰ্দেশনাও প্ৰদান কৰিছে।
উল্লেখযোগ্য যে অযোধ্যা দীপোৎসৱৰ এই কাৰ্যসূচীৰ ভব্যতাৰ বাবে এতিয়া ই সমগ্ৰ বিশ্বতে স্বীকৃতি লাভ কৰিছে। এনে পৰিস্থিতিত অনুষ্ঠানৰ মৰ্যাদাৰ সম্পূৰ্ণ যত্ন লোৱাটো প্ৰয়োজনীয়। সকলো প্ৰস্তুতি সময়মতে সম্পূৰ্ণ কৰাৰ প্ৰয়াস কৰা হৈছে। ইফালে মুখ্যমন্ত্ৰী যোগী আদিত্যনাথেও প্ৰশাসনিক আৰু আৰক্ষী বিষয়াৰ সৈতে ৰাজ্যিক পৰ্যায়ৰ বৈঠকত এই সন্দৰ্ভত নিজৰ উদ্দেশ্য স্পষ্ট কৰি দিয়ে। বিষয়াসকলক সতৰ্ক কৰি দিওঁতে তেওঁ কৈছে যে দীপোৎসৱ আনন্দৰ অনুষ্ঠান আৰু এই সময়ছোৱাত সাধাৰণ জনতাৰ আৱেগ-অনুভূতিৰ প্ৰতি গুৰুত্ব দিয়াটো আৰক্ষীৰ নৈতিক কৰ্তব্য। ইয়াত যিকোনো ধৰণৰ গাফিলতি ক্ষমাযোগ্য নহয়। যদিও মুখ্যমন্ত্ৰী যোগীৰ এই কথাবোৰ অতি নৰম, তথাপিও ইয়াৰ বাৰ্তাও সমানেই শক্তিশালী।
মন কৰিবলগীয়া যে ২০১৭ চনৰ পৰা প্ৰতি বছৰে দীপোৎসেৱে এক নতুন অভিলেখ গঢ়িবলৈ সক্ষম হৈছে। এইবাৰ ২১ লাখ বন্তিৰে অৱধপুৰী আলোকিত কৰাৰ প্ৰস্তুতি চলোৱা হৈছে। ইয়াৰ বাবে বন্তি, শলিতা, তেল,ঠাই, স্বেচ্ছাসেৱক আদিৰ যথোচিত ব্যৱস্থা কৰা হৈছে।
সনাতন পৰম্পৰাৰ অবিচ্ছেদ্য অংগ দীপোৎসৱ-
সনাতন পৰম্পৰাৰ অবিচ্ছেদ্য অংগ দীপোৎসৱ। এয়া মৰ্যাদা পুৰুষোত্তম ভগৱান শ্ৰী ৰাম, মাতৃ সীতা আৰু ভাতৃ লক্ষ্মণৰ ১৪ বছৰ বনবাসৰ অন্তত অযোধ্যালৈ ঘূৰি অহাৰ এক পবিত্ৰ স্মৃতি। অযোধ্যা দীপোৎসৱত ভগৱান শ্ৰীৰামৰ অযোধ্যালৈ ঘূৰি অহা, ভাৰত মিলাপ, শ্ৰীৰামৰ ৰাজ অভিষেক আদি ঘটনাৰ প্ৰতীকী চিত্ৰণো থাকিব। সৰযু মাতাৰ আৰতিও পৰিবেশন কৰা হ’ব। কেৱল এয়াই নহয়, চাৰিখন দেশ আৰু ২৪খন ৰাজ্যৰ ৰামলীলাৰ মঞ্চায়নে এই মুহূৰ্তটোক উল্লাসময়ী কৰি তুলিব। সমগ্ৰ বিশ্বই এই অনুষ্ঠানৰ ওপৰত নজৰ ৰাখিছে।
আটকধুনীয়াকৈ সজাব অযোধ্যা, কঠোৰ নিৰাপত্তাৰ ব্যৱস্থা –
পোহৰৰ উৎসৱৰ ভৱ্যতা প্ৰত্যক্ষ কৰিবলৈ বৃহৎ সংখ্যক ভক্তই অংশগ্ৰহণ কৰিব। মূল অনুষ্ঠানৰ উপৰিও অযোধ্যা চহৰৰ সকলো ধৰ্মীয় স্থান, মঠ, মন্দিৰৰ সজ্জাও থাকিব। এনে পৰিস্থিতিত কেৱল ভগৱান ভক্তৰেই নহয় বিদেশী পৰ্যটকৰ সমাগম হ’ব। আঞ্চলিক লোকৰ আগমনৰ লগে লগে ইয়াত ভিৰ নিয়ন্ত্ৰণ কৰা আৰু তেওঁলোকক অনুশাসিত কৰি ৰখাটোও এক প্ৰত্যাহ্বানমূলক কাম হ’ব। এই কথা মনত ৰাখি নিৰাপত্তা ব্যৱস্থা শক্তিশালী কৰাৰ কামো আৰম্ভ হৈছে।
পোনপটীয়া সম্প্ৰচাৰৰ ব্যৱস্থা –
লগতে অযোধ্যা জিলাৰ বিভিন্ন স্থানত অনুষ্ঠানৰ পোনপটীয়া সম্প্ৰচাৰ (লাইভ টেলিকাষ্ট)ৰ ব্যৱস্থা কৰা হ’ব। যাতে অধিক সংখ্যক লোকে পোহৰৰ উৎসৱত জড়িত হৈ পৰিব পাৰে। এই সন্দৰ্ভত ইতিমধ্যে স্থলী নিৰ্বাচন আৰু সম্প্ৰচাৰৰ ব্যৱস্থা চূড়ান্ত কৰা হৈছে। ৰাম কি পেডী আৰু এনেধৰণৰ অন্যান্য স্থানত সম্প্ৰচাৰৰ পৰীক্ষণৰ কাম অবিৰত গতিত চলি আছে। ব্যৱস্থাটোৰ সৈতে জড়িত লোক আৰু কৰ্মীসকলে নিশাও পৰীক্ষা কৰি আছে।
লোকসকলৰ সুৰক্ষিত প্ৰস্থানৰ পৰিকল্পনা-
দীপোৎসৱৰ মূল কাৰ্য্যৰ পিছত নিৰাপদে লোকসকল প্ৰস্থান কৰাৰ ব্যৱস্থা কৰা হৈছে। তেওঁলোকে যাতে সহজে গন্তব্যস্থানত উপনীত হয় তাৰ বাবে প্ৰতিটো স্থানতে পৰিকল্পনাৰ কাম চলি আছে। মহিলা, শিশু আৰু বিদেশী শিল্পীকো নিৰাপদে ঘৰলৈ পঠোৱাৰ ব্যৱস্থা কৰা হৈছে। কেৱল এয়াই নহয়, ষ্টেম্পেডৰ পৰিস্থিতি ৰোধ কৰাৰ ব্যৱস্থাও বিচাৰি উলিওৱা হৈছে। এনে পৰিস্থিতিৰ সৃষ্টি হ’লেও ইয়াৰ সৈতে মোকাবিলা কৰিবলৈ পৰ্যাপ্ত আৰক্ষী বাহিনী নিয়োগ কৰাটো নিশ্চিত কৰা হৈছে। মন্দিৰত ভিৰ হোৱাৰ সম্ভাৱনাৰ প্ৰতি লক্ষ্য ৰাখি ২৪×৭ আৰক্ষী বাহিনী নিয়োগ কৰাৰ প্ৰস্তুতি চলাই থকা হৈছে।
প্ৰশাসন-আৰক্ষীলৈ নিৰ্দেশনা-
আনন্দ আৰু উৎসাহৰ উৎসৱ দীপোৎসৱত অযোধ্যালৈ ভাৰত আৰু বিদেশৰ পৰা স্থানীয় লোক আৰু পৰ্যটক আহে। এনে পৰিস্থিতিত তেওঁলোকেও কিছু অসুবিধাৰ সন্মুখীন হ’বলগীয়া হয়। প্ৰশাসনিক আৰু আৰক্ষী কৰ্মচাৰীৰ অভদ্ৰ স্বভাৱৰ বাবেও এই অসুবিধাৰ সৃষ্টি হয় যদিও এইবাৰৰ অনুষ্ঠানত ইয়াৰ পৰিসৰ শূন্যলৈ হ্ৰাস কৰাৰ কৌশলৰ কাম চলি আছে। নিৰাপত্তাৰ ব্যৱস্থাৰ সৈতে জড়িত প্ৰশাসনিক আৰু আৰক্ষী বিষয়া আৰু কৰ্মীসকলক জনসাধাৰণৰ আৱেগক সম্পূৰ্ণৰূপে সন্মান কৰিবলৈ নিৰ্দেশ দিয়া হৈছে। জনসমাগম নিয়ন্ত্ৰণত নিয়োজিত আৰক্ষী বাহিনীৰ আচৰণ সহজ আৰু সহযোগী কৰি তোলাৰ লগতে সাধাৰণ জনতাৰ চলাচল আৰু আসনৰ সঠিক ব্যৱস্থা কৰাতো গুৰুত্ব আৰোপ কৰা হৈছে।
হিন্দুস্থান সমাচাৰ/ড. আমোদকান্ত/মনোজ/অৰবিন্দ
